Երևանի քաղաքապետարանը ծրագրում է վերականգնել «Էրեբունի» արգելոց–թանգարանի տարածքում գտնվող բերդապարիսպը

ԵՐԵՎԱՆ, 29 հունվարի. /Նովոստի–Արմենիա/. Երևանի քաղաքապետարանը ծրագրում է «Էրեբունի» արգելոց–թանգարանի բերդապարսպի վերականգնման աշխատանքներ իրականացնել բարեկարգման եռամյա ծրագրի շրջանակում, չորեքշաբթի լրագրողներին հայտնեց Երևանի փոխքաղաքապետ Արամ Սուքիասյանը։

«Դեկորատիվ բերդապարսպից բացի, մենք ծրագրում ենք ստեղծել ամֆիթատրոն, որտեղ կներկայացվեն թանգարանի ցուցանմուշները»,– ասաց Սուքիասյանը։

Ըստ նրա, ծրագրի իրագործման աշխատանքները կսկսեն արդեն 2014 թվականին։

«Եռամյա նախագծի համար հատկացվել է 300 մլն դրամ։ Մենք միաժամանակ հույս ունենք, որ ծրագրով կհետաքրքրվեն տարբեր ներդրողներ և միջազգային կազմակերպություններ»,– հայտնեց փոխքաղաքապետը` պատասխանելով «Նովոստի–Արմենիա» գործակալության հարցին։

Էրեբունին ուրարտական քաղաքն է, որի փլատակները գտնվում են ժամանակակից Երևանի ծայրամասում, Արին-Բերդ բլուրի վրա։ Քաղաքը կառուցվել է Ուրարտուի թագավոր Արգիշտի Առաջինի կողմից՝ մ.թ.ա. 782 թ.-ին՝ որպես Արարատյան դաշտավայրում ուրարտացիների ամրանալու հենակետ։

1950թ. պեղումների արդյունքում բացվել են ամրոցի հզոր պատերը՝ դարպասներով, պալատը, երկու տաճար և տնտեսական շինություններ։ Էրեբունու տարածքը վերածվել է հնագիտական արգելոց-թանգարանի։--0—