Շվեյցարացի հայտնի դիրիժոր Միխաել Վենդեբերգը համերգ կունենա Երևանում փետրվարի 2-ին

ԵՐԵՎԱՆ, 23 հունվարի. /Նովոստի–Արմենիա/. Շվեյցարացի հայտնի դիրիժոր Միխաել Վենդեբերգը համերգ կունենա փետրվարի 2-ին Երևանի Ա.Սպենդիարյանի անվան օպերայի և բալետի ազգային ակադեմիական թատրոնում, «Նովոստի-Արմենիա» գործակալությանը հայտնեց թատրոնի հասարակայնության հետ կապերի համակարգող Թերեզա Բարսեղյանը։

«Այդ օրը մաեստրոյի հետ միասին հանդես կգան օպերայի և բալետի թատրոնի սիմֆոնիկ նվագախումբը և երգչախումբը։ Նրանք կներկայացնեն Մոցարտի «Կախարդական սրինգ» օպերայի համերգային կատարումը», - ասաց Բարսեղյանը։

Համերգի մենակատարներն են Հայաստանի վաստակավոր արտիստներ Մարինե Դեինյանը և Առնոլդ Քոչարյանը, ինչպես նաև Նունե Բադալյանը, Հասմիկ Թորոսյանը, Արծվիկ Դեմուրչյանը և այլ երաժիշտներ։

Դիրիժոր և դաշնակահար Միխաել Վենդեբերգը եղել է այնպիսի նվագախմբերի խմբավարը, ինչպիսիք են Բեռլինի պետական կապելլան, «Մուզիկֆաբրիկ Քյոլնը», Շտուտգարդի «Նոր ոկալ մենակատարներ» և շվեյցարական «Contrechamps» անսամբլները, Բեռլինի պետական օպերային թատրոնի «Appoloni et Musis» կամերային երգչախումբը, ինչպես նաև Ցյուրիխի «Collegium Novum» համույթը։

2011 թ.–ից Վենդեբերգը Լյուցեռնի թատրոնի դիրիժորն ու երաժշտական ղեկավարի տեղակալն է, իսկ այժմ նա նաև «Contrechamps» համույթի երաժշտական ղեկավարն է։ –0–