Հայ ռեժիսորի կինոնկարը Լեհաստանում անցկացվող «Zoom – Zbliżenia» կինոփառատոնի եզրափակիչ փուլ է անցել

ԵՐԵՎԱՆ, 14 հունվարի. /Նովոստի–Արմենիա/. Ռեժիսոր և սցենարիստ Արշակ Զաքարյանի «Անօգուտ» հայկական ֆիլմը Լեհաստանում անցկացվող «Zoom – Zbliżenia» ոչ կոմերցիոն ֆիլմերի միջազգային կինոփառատոնի եզրափակիչ մրցութային փուլ է անցել, «Նովոստի–Արմենիա» գործակալությանը տեղեկացրեցին ֆիլմի ստեղծագործական խմբի ներկայացուցիչները։

Լեհաստանի Ելենյա–Գուրա քաղաքում փետրվարի 20–23–ը կայանալիք փառատոնին մասնակցելու համար ներկայացվել էր 649 ֆիլմ, որոնցից եզրափակիչ է անցել 82–ը։

Արշակ Զաքարյանի «Անօգուտը» կարճամետրաժ ֆիլմը պատմում է մի տղամարդու մասին, ով որոշել է ինքնասպանություն գործել, սակայն հրաժարվում է իր մտադրությունից` երեխային փրկելու համար։

«Zoom – Zbliżenia» փառատոնն անցկացվում է 1997 թ.–ից։ Փառատոնի նպատակն է ներկայացնել տարբեր մշակույթներ, կինոլեզուներ, գաղափարների փոխանակում, ինչպես նաև առաջ մղել անկախ կինոն։

Մրցույթի ձևաչափն է կարճամետրաժ և լիամետրաժ խաղարկային և վավերագրական կինո և անիմացիա, ինչպես նաև վիդեո–արտ։ Փառատոնի կատեգորիաներն են անկախ ֆիլմ, սիրողական ֆիլմ, ուսանողական ֆիլմ։–0–