ԵՐԵՎԱՆ, 9 հունվարի. /Նովոստի–Արմենիա/. Հայտարարվել են 2014 թվականին ԱՄՆ–ում «Ժողովրդական ընտրություն» (People's Choice) մրցանակակիրները` ժողովրդի «սիրելիներ» են ճանաչվել Սանդրա Բալոքը և Ջոննի Դեպը։
People's Choice –ն ԱՄՆ–ում միակ մրցանակն է, որի դափնեկիրներին ընտրում են համազգային քվեարկության արդյունքում։ Հաղթողներին հայտարարել են չորեքշաբթի երեկոյան` Լոս Անջելեսի Nokia համերգասրահում կայացած հանդիսավոր արարողության ժամանակ, գրում է ՌԻԱ Նովոստին։
Հանդիսատեսի կարծիքով, տարվա լավագույն դերասանուհի է ճանաչվել Սանդրա Բալոքը։ Նրան էլ հենց համաժողովրդական քվեարկության արդյունքներով բաժին է հասել հաղթանակը «լավագույն կատակերգական դերասանուհի» և «լավագույն դրամատիկ դերասանուհի» անվանակարգերում։ Բալոքը նվաճել է նաև «ժողովրդական» մրցանակը «լավագույն կինոդուետ» անվանակարգում «Գրավիտացիա» «Տիեզերական ձգողականություն») ֆիլմի համար, որում նրա խաղընկերն էր Ջորջ Քլունին։ Հանդիսատեսի կարծիքով` այդ կինոժապավենը տարվա «լավագույն դրամատիկ ֆիլմն» է։
Սիրելի կինոդերասանի կոչմանն այս տարի արժանացել է Ջոննի Դեպը, որն այդ անվանակարգում առաջ է անցել Հյու Ջեքմանից, Չենինգ Թաթումից, Լեոնարդո դի Կապրիոյից և Ռոբերտ Դաունի Կրտսերից։ Լեոնարդո Դի Կապրիոն հաղթել է «լավագույն դրամատիկ դերասան» անվանակարգում։
Տարվա լավագույն ֆիլմը, հեռուստադիտողների կարծիքով, դարձել է «Երկաթյա մարդ-3» ժապավենը (Iron Man 3)։ Լավագույն երաժշտական ալբոմը Ջասթին Թիմբերլեյքի The 20/20 Experience ալբոմն է։ Ժողովրդի սիրելիի կոչումը փոփ–երաժշտության ասպարեզում նվաճել է Բրիթնի Սփիրսը` այդ անվանակարգում առաջ անցնելով Դեմի Լովատոյից, Քեթի Փերիից, Բրունո Մարսից և Ջասթին Թիմբերլեյքից։
«Ժողովրդական ընտրություն» մրցանակը հիմնվել է 1975 թվականին, երբ հեռուստադիտողին առաջարկվել էր ընտրել իրենց սիրելիներին 14 անվանակարգերում։ Անցած 40 տարիների ընթացքում աճել է ոչ միայն անվանակարգերի թիվը, այս տարի հաղթողներին ընտրել են 58 անվանակարգերում, այլ նաև պարգևի նշանակությունը դերասանների, երաժշտական կատարողների, հեռուստահաղորդավարների պրոֆեսիոնալ շրջանակներում։ -0-
