Հայաստանի պետական երիտասարդական նվագախումբը դեկտեմբերի 19-ին իր գործունեության ընթացքում առաջին անգամ կկատարի հայտնի կոմպոզիտոր Առնո Բաբաջանյանի ստեղծագործությունները «Բաբաջանյան ֆեստ» փառատոնի շրջանակներում կազմակերպված բացառիկ համերգի ժամանակ, որին կմասնակցեն հայկական էստրադայի և օպերայի աստղերը, ասաց նվագախմբի գլխավոր դիրիժոր և գեղարվեստական ղեկավար Սերգեյ Սմբատյանը:
«Քանի որ մենք այս տարի նշում ենք աշխարհահռչակ հայ կոմպոզիտորի 90-ամյակը, վեցերորդ համերգի ժամանակ մենք հայ աստղերի հետ միասին կներկայացնենք նրա էստրադային ստեղծագործությունները: Դա շատ հետաքրքիր է», - ուրբաթ մամուլի ասուլիսի ժամանակ ասաց Սմբատյանը:
Համերգի ժամանակ կհնչեն Բաբաջանյանի այնպիսի հայտնի երգեր, ինչպիսին են՝ «Իմ Երևանը», «Մեր սիրելի Երևանը», «Սատանայի անիվ», «Նոկտյուրն», «Ճակատագիր», «Հարսանիք», «Շնորհակալ եմ քեզ», «Գեղեցկության թագուհի», «Պատկառուկը», «Վերադարձրու ինձ երաժշտությունը», «Սպիտակ փաթիլ», «Քո հետքերը», «Կամուրջներ, կամուրջներ», «Սիրո տարի»:
Բոլորի կողմից սիրված երգերը կհնչեն Հայաստանի պետական երիտասարդական նվագախմբի կատարմամբ՝ գեղարվեստական ղեկավար և գլխավոր դիրիժոր Սերգեյ Սմբատյանի ղեկավարությամբ և հայկական էստրադայի աստղեր Հայկոյի, Սիրուշոյի, Անդրեի, Սոֆի Մխեյանի, Էմմիի, Անահիտ Սիմոնյանի, Մհերի, Էրիկի, Մարատ Հայրապետյանի և օպերային մեներգիչ, բարիտոն Գևորգ Հակոբյանի մասնակցությամբ:
Նվագախմբի գլխավոր դիրիժորը նշեց, որ երգերն ընտրվել են՝ ելնելով երգիչների նախապատվությունից և նրանց վոկալային դիապազոնից: Միաժամանակ նա ընդգծեց, որ համերգի համար նոր պարտիտուրաներ են կազմվել, որոնց հեղինակն է Կարեն Անանյանը:
Անանյանն իր հերթին նշեց, որ նոր պարտիտուրաները վերստեղծել և կազմել է տարբեր արխիվներից: Նա նաև նշեց, որ նրան մեծ աջակցություն է ցուցաբերել Ռադիոյի և հեռուստատեսության պետական էստրադային սիմֆոնիկ նվագախումբը (ջազ նվագախումբը)՝ Երվանդ Երզնկյանի գլխավորությամբ, ով հռչակավոր կոմպոզիտորի ստեղծագործությունները կատարում է առանց պարտիտուրայի:
Միաժամանակ Էմմին նշեց, որ «Կամուրջներ, կամուրջներ» երգը, որը նա բազմաթիվ անգամ կատարել է, առավել պահանջված է նրա երգացանկում:
Հայկոն իր հերթին ընդգծեց, որ այս նախագիծն արդեն երկրորդ շունչն է հաղորդել Բաբաջանյանի ստեղծագործություններին՝ վերականգնելով նրա գրած երգերից շատերը:
Հռչակավոր կոմպոզիտոր Առնո Բաբաջանյանի 90-ամյակին նվիրված «Բաբաջանյան ֆեստ» փառատոնն անցկացվում է ՀՀ նախագահ Սերժ Սարգսյանի բարձր հովանու ներքո:
Փառատոնի կազմակերպիչներն են ՀՀ մշակույթի նախարարությունը, Հայաստանի կոմպոզիտորների և երաժշտագետների միությունը, Հայաստանի պետական երիտասարդական նվագախումբը, որի գլխավոր դիրիժոր և գեղարվեստական ղեկավարն է Սերգեյ Սմբատյանը:
Նոյեմբերի 21-ին մեկնարկած փառատոնի շրջանակներում արդեն հինգ համերգ է տեղի ունեցել:
«Նովոստի-Արմենիա» գործակալությունը միջոցառման ինֆորմացիոն հովանավորն է:-0-
