«Կինոյի աշխարհ» նոր թերթը շուտով լույս կտեսնի

ԵՐԵՎԱՆ, 7 դեկտեմբերի. /Նովոստի-Արմենիա/. Հայաստանի ազգային կինոկենտրոնն առաջիկայում մտադիր է նոր թերթ հրատարակել՝ «Կինոյի աշխարհ» անունով, «Նովոստի-Արմենիա» գործակալությանը հայտնեց կինոկենտրոնի հասարակայնության հետ կապերի պատասխանատու և ծրագրերի ղեկավար Ռուզան Բագրատունյանը: 

«Ամենամսյա թերթ կլինի, որը կինոյի աշխարհում տեղի ունեցող իրադարձությունների բովանդակալից ու լիարժեք տեղեկատվություն կպարունակի»,- ասաց Բագրատունյանը՝ չնշելով առաջին համարի լույս տեսնելու հստակ ամսաթիվը:

Նրա խոսքով՝ թերթի էջերում տեղ կգտնեն «Կինոյի խնդիրները», «Ծրագրեր», «Փառատոներ», «Հայկական կինոյի մեծ գործիչները», «Հարցազրույց», «Նկարահանման հրապարակ», «Երիտասարդ կինոքննադատների ամբիոն», «Երաժշտություն և կինո» բաժինները:

Բագրատունյանը նշեց, որ թերթը կհրատարակվի 1 միլիոն տպաքանակով, իսկ յուրաքանչյուր համարը նախատեսվում է թողարկել յուրաքանչյուր ամսվա հինգին:

Նա ընդգծեց, որ թերթ հրատարակելու նախաձեռնությունը կինոկենտրոնինն է և իրականացվում է կինոկենտրոնի տեխնիկական և ֆինանսական մասնակցությամբ:--0-