ԵՐԵՎԱՆ, 17 նոյեմբերի. /Նովոստի-Արմենիա/. «Էպիկենտրոն» բացառիկ համերգ-ցուցահանդեսը, որը կբացվի երեքշաբթի Երևանի ժամանակակից արվեստի թանգարանում, պետք է հասարակայնության ուշադրությունը հրավիրի Ժամանակակից արվեստի թանգարանի անմխիթար վիճակի վրա, հայտարարեց Հայաստանի մշակույթի նախարարության Ժամանակակից արվեստի վարչության պետ Սոնա Հարությունյանը:
Հայաստանի մշակութային կյանքի այս աննախադեպ իրադարձությունն իրենից արվեստի երկու ուղղությունների՝ գեղանկարչության և երաժշտության համակցում կներկայացնի:
Ցուցահանդեսում կներկայացվի հայ գեղանկարչուհի Մարիամ Խաչատրյանի (Մոկո) վրձնի 24 կտավ, իսկ հայտնի կոմպոզիտոր և դաշնակահար Հայկ Մելիքյանը կկատարի հայ դասականներ Տիգրան Մանսուրյանի և Հարություն Դելալյանի ստեղծագործությունները: Բացի այդ, Մելիքյանը կներկայացնի նաև իր երաժշտական ստեղծագործությունը, որը «Էպիկենտրոն» անունն է կրում:
Միաժամանակ համերգ-ցուցահանդեսի այցելուներին անակնկալ է սպասում՝ նկարչուհին և դաշնակահարը զուգահեռ կստեղծեն իպրովիզացիաներ՝ յուրաքանչյուրն իր ժանրում:
«Իր գաղափարային և նպատակային նշանակությամբ ցանկալի չէր այդ միջոցառումն անցկացնել որևէ այլ վայրում: Մենք այն անցկացնում ենք Ժամանակակից արվեստի թանգարանում, որ ևս մեկ անգամ հնարավորություն ընձեռենք այս նախագծին միանալ ցանկացող մարդկանց տեսնել, թե ինչպիսի պայմաններում է գտնվում թանգարանը»,- ասաց նա «Նովոստի» միջազգային մամուլի կենտրոնում:
Նա հիշեցրեց, որ այդ թանգարանում են գտնվում այնպիսի հայ ականավոր գեղանկարիչների գլուխգործողներ, ինչպիսիք են՝ Ռուդոլֆ Խաչատրյանը, Մինաս Ավեստիսյանը, Լավինիա Բաժբեուկ-Մելիքյանը:
Թվարկելով մշակութային այս օջախի հիմնական խնդիրները՝ Հարությունյանը նշեց, որ թանգարանը բացարձակապես չի ձեռուցվում, նոր տարածքի կառուցման անհրաժեշտություն կա, քանի որ որևէ նորոգում չի օգնի բարելավել այս շենքի վիճակը:
«Արդեն երեք օր է, ինչ արվեստի մեր գործիչներն այնտեղ ցուցադրությունն են պատրաստում, Հայկը փորձում է այդ անբարենպաստ պայմաններում դաշնամուր նվագելու համար պայմաններ ստեղծել, որ ձեռքերը չսառչեն»,- ընդգծեց նա:
Հարությունյանը նշեց, որ թանգարանի շենքը պատկանում է ոչ թե Մշակույթի նախարարությանը, այլ քաղաքապետարանին: Նրա խոսքով, քաղաքապետարանի հետ ունեցած քննարկումների արդյունքում որոշվել է, որ այսուհետ թանգարանի ֆոնդը փոխանցվել է Մշակույթի նախարարության լիազորության ներքո, իսկ շենքը կմնա որպես քաղաքապետարանի սեփականություն:
Վարչության պետը հույս հայտնեց նաև, որ Երևանի նորընտիր քաղաքապետն ուշադրություն կդարձնի ժամանակակից արվեստի թանգարանին՝ հավելելով, որ Մշակույթի նախարարությունը պատրաստ է համակողմանի օժանդակություն ցուցաբերել թանգարանի վերականգնման գործում:
Երևանի ժամանակակից արվեստի թանգարանը ստեղծվել է 1972 թվականին և համարվել է խորհրդային տարածքի իր ժամանակաշրջանի բացառիկ թանգարաններից մեկը: Թանգարանում պահվում են Գարզուի, Գալենցի, Պոդպոմոգովի, Խանջյանի, Բաժբեուկ-Մելիքյանի գործերը: -0-
