Դեկտեմբերի կեսին Հայկական գրքի տուն կբացվի Մոսկվայում

Հայկական գրքի տունը կսկսի գործել դեկտեմբերի կեսին Մոսկվայում՝  Բասմաննայա 19 հասցեում (Սադովոյե կոլցոյի սահմաններում), «Նովոստի-Արմենիա» գործակալությանը հաղորդեցին ԱՊՀ երկրների երիտասարդական միության մամուլի կենտրոնից:

«Ֆունկցիոնալ տեսանկյունից այն լիովին նման կլինի Ռուսական գրքի տանը, որը գտնվում է Երևանի Մաշտոցի պողոտայում: Երկու տները սերտ փոխկապակցված կլինեն, ինչը թույլ կտա ևս մեկ ամուր թել ստեղծել, որը կկապի ռուս և հայ ժողովուրդների բարեկամությունը: Հայկական գրքի տունը նաև կգործի որպես հասարակական և մշակութային կենտրոն»,- ասվում է հաղորդագրության մեջ:

Հայկական գրքի տան կազմում կգործի նաև «Արմենիա» մամուլի կենտրոնը, որը կհամագործակցի Երևանում գործող Ռուսական գրքի տան «Ռոսիա» մամուլի կենտրոնի հետ: Մոսկվայում բացվող Հայկական գրքի տունը կզբաղվի «Ռուսաստանի հայկական աշխարհ» ամսագրի հրատարակմամբ: Տան շրջանակներում կանցկացվեն նաև հայերեն լեզվի դասընթացներ՝ նախատեսված տարիքային բոլոր խմբերի համար, կգործեն «Հայկական գիրք» խանութն ու քննարկումների ակումբը:

Ռուսաստանի քաղաքներում Հայկական գրքի տան բացման մասին որոշումը ընդունվել է հոկտեմբերի 1-ին ԱՊՀ երկրների երիտասարդական միության վարչության խորհրդի կողմից: Հիշեցնենք, որ հունիսին այդ խորհրդի նախագահի պաշտոնում ընտրվել է հասարակական գործիչ Անդրանիկ Նիկողոսյանը:-0-