Հայաստանի վարչապետ Տիգրան Սարգսյանը Հայաստանի կրթության և գիտության նախարար Արմեն Աշոտյանի և պաշտոնատար այլ անձանց ուղեկցությամբ չորեքշաբթի այցելեց Երևանի թատրոնի և կինոյի պետական ինստիտուտ:
Այցի շրջանակներում վարչապետը բուհի ռեկտոր Արմեն Մազմանյանի ուղեկցությամբ շրջել է ինստիտուտի շենքում, ծանոթացել շենքի նորոգված հատվածներին:
Երևանի թատրոնի և կինոյի պետական ինստիտուտի վերակազմավորման արդյունքում ստեղծվել է առանձին երեք ֆակուլտետ իրենց ամբիոններով՝ Թատրոնի ֆակուլտետ, Կինոյի, հեռուստատեսության և անիմացիայի ֆակուլտետ, Արվեստի պատմության, տեսության և մենեջմենթի ֆակուլտետ:
Ինչպես ասաց Մազմանյանը լրագրողներին, Հայաստանի կառավարության տրամադրած միջոցներով Ինստիտուտում նորոգվել է 250 քառակուսի մետր ընդհանուր մակերեսով տարածք:
Նրա խոսքով՝ նորոգվել են գրադարանը, գրապահոցը, ընթերցասրահը, հինգ լսարան, յոթ աշխատասենյակ, բուհի ճաշարանը վերածվել է յուրօրինակ արտ-սրճարանի, ինչպես նաև կառուցվել են նոր համակարգչային և պարային հայելապատ սրահներ:
Մազմանյանը հայտնեց, որ ծախսված միջոցների ընդհանուր ծավալը կազմել է 41,6 մլն դրամ (մոտ 110 հազ դոլար), որոնցից 34 մլն դրամը հատկացվել է շինարարական աշխատանքներին, իսկ 7,6 մլն դրամը՝ տեխնիկայի և գույքի ձեռքբերմանը:
ՀՀ կառավարության ղեկավարը դիտել է նաև բուհի Ուսումնական կենտրոնի կողմից «Գոյ» բեմարվեստի ազգային էքսպերիմենտալ կենտրոնի հետ համատեղ բեմադրված «Գարեգին Նժդեհ. Հայաստանը և ճշմարտությունը» ներկայացումն Արմեն Մազմանյանի բեմադրությամբ: -0-
