Empyray ռոք-խումբը նոր ալբոմ է ներկայացնում

Empyray ճանաչված ռոք խմբի «Մեկընդմիշտ» նոր ալբոմի համերգ շնորհանդեսը կանցկացվի նոյեմբերի 3-ին Երևանի Գ. Սունդուկյանի անվան Ազգային ակադեմիական թատրոնում, հայտնեց խմբի հիմնադիր Սարգիս Մանուկյանը:

«Սա մեր խմբի երրորդ ալբոմի շնորհանդեսն է: Մեր շնորհանդեսները միշտ անցկացվում են համերգի ձևաչափով, քանի որ կարծում ենք, որ երաժշտությամբ զբաղվող մարդիկ պետք է կարողանան իրենց ստեղծագործությունները լատարել նաև բեմում»,- ասաց Մանուկյանը:

Նա ընդգծեց, որ նոր ալբոմում կընդգրկվեն հայ իրականության մեջ գոյություն ունեցող խնդիրների մասին պատմող երգեր: Նա միաժամանակ նշեց, որ երգերի հեղինակներն ու կառարողները հեռու են քաղաքականությունից և իրենց երգերում արտահայտում են ընդամենը սեփական քաղաքացիական դիրքորոշումը:

Մասնավորապես, Մանուկյանը հատուկ առանձնացրեց «Վերադառնում եմ» երգը, որը շոշափում է արտագաղթի խնդիրը:
«Եթե այս երգն արտագաղթից հետ պահի գոնե 10 ընտանիքներ, ապա կհամարենք, որ կարողացել ենք ինչ-որ բան փոխել մեր գործունեությամբ»,- ընդգծեց երաժիշտը:

Պատասխանելով այն հարցին, թե որքանով է ռոքն ընդունակ փոխելու իրականությունը, երաժիշտն ընդգծեց, որ դա կախված է հասարակության մեջ տվյալ երաժշտական ժանրի ընդունված լինելու աստիճանից:

Ըստ նրա, ռոք երաժիշտը բոլորովին պարտավոր չէ իր յուրաքանչյուր երգում հասարակական որևէ խնդիր բարձրացնել, և միաժամանակ, նա չի կարող անտարբեր և պասիվ մնալ իրադարձությունների նկատմամբ:

Խմբի կոմպոզիտոր և երաժիշտ Գիսանե Պալյանն իր հերթին հայտնեց, որ Empyray-ի նոր ալբոմում ընդգրկվել են ամենատարբեր թեմաներով բուն հայկական, «կոմիտասյան» հնչողությամբ առանձնացող 11 երգեր՝ այստեղ կլինեն հումորային երգեր, փիլիսոփայական և սոցիալական թեմաներով երգեր:

Նա կոչ արեց հասարակությանն ուշադրություն դարձնել այն ռոք-երաժիշտներին, ովքեր ձևավորվում են այսօր հայ հասարակության մեջ, սակայն հաճախ հնարավորություն չունեն հանդես գալու մեծ և տեխնիկապես զինված բեմերում:

Empyray խումբը ստեղծվել է 1993 թվականին Սարգիս Մանուկյանի և Կարեն Արզումանյանի կողմից և լայն ճանաչում է գտել 2005 թվականին: 2006 թվականին խումբը թողարկել է իր աեաջին ալբոմը՝ բաղկացած 13 թրեքներից: Նույն տարում Ազգային երաժշտական մրցանակաբաշխության ժամանակ ճանաչվել է Հայաստանի լավագույն ռոք խումբ: -0-