Ռուս հայտնի բանաստեղծ, դրամատուրգ Յուրի Էնտինի «Շատ վեցոտնուկների մասին» ֆիլմի համաշխարհային պրեմիերան կանցկացվի երեքշաբթի՝ Երևանում մեկնարկած Հայաստանի մանկապատանեկան ֆիլմերի յոթերորդ փառատոնում:
Փառատոնն անցկացվում է Հայաստանի մայրաքաղաքում հոկտեմբերի 22-26-ը, իսկ փառատոնի մարզային ծրագիրը կշարունակվի մինչև նոյեմբերի 25-ը: Այս տարի միջոցառումը նվիրված է Հայաստանի անկախության 20-ամյակին, և դրա շրջանակներում կցուցադրվեն անիմացիոն, վավերագրական, գեղարվեստական ֆիլմեր, ինչպես նաև մուլտֆիլմեր երեխաների համար:
«Փառատոնի ընթացքում կկայանա իմ ֆիլմի պրեմիերան, որի վրա աշխատել եմ 40 տարի»,- լրագրողներին ասաց փառատոնի պատվավոր հյուր Էնտինը:
Նա տեղեկացրեց, որ կինոնկարի ռեժիսոր է դարձել իր խորթ տղա Լեոնիդ Վորոնցովը, ով բավական ինքնամփոփ երեխա լինելով, շատ էր հետաքրքրվում միջատներով և նրան ոգեշնչել է մուլտֆիլմի ստեղծմանը:
Մուլտֆիլմի հերոսներին կրկնօրինակում են թատրոնի և կինոյի ճանաչված ռուս դերասաններ Արմեն Ջիգարխանյանը, Դմիտրի Խառատյանը, Իրինա Մուրավյովան: Անիմացիոն կինոնկարի երաժշտությունը գրել է հայտնի ռուս կոմպոզիտոր Դավիթ Տուխմանովը, իսկ երգերը կատարում է հենց Էնտինը:
Երեխաների և պատանիների համար նախատեսված ֆիլմերի միջազգային փառատոնի մրցութային ծրագիրը ներկայացված է հետևյալ անվանակարգերում՝ «Փառատոնի գրան-պրի», «Լավագույն լիամետրաժ ֆիլմ», «Լավագույն անիմացիոն աշխատանք», «Լավագույն ֆիլմ «Ես իրավունք ունեմ» անվանակարգում»:
Փառատոնի պատվավոր հյուրեր կլինեն Ռուսաստանի արվեստի վաստակավոր գործիչ, հայտնի կինոգետ Արմեն Մեդվեդևը, ուզբեկ ռեժիսոր Ջասուր Իսխանովը, «Երալաշ» ռուսական հայտնի կինոամսագրի հեղինակ Բորիս Գրաչևսկին, Վրաստանի «Պիոներֆիլմ» կինոստուդիայի ղեկավար Գրիգոլ Չիգոգիձեն, Ղազախստանի կինեմատոգրաֆիստների միության ղեկավար Իգոր Վովնյանկոն:
Փառատոնը կազմակերպվել է Ռոլան Բիկովի անվան Մանկապատանեկան կինոյի և հեռուստատեսության զարգացման հիմնադրամի հայկական հիմնադրամի կողմից և կանցկացվի ՄԱԿ-ի Մանկական հիմնադրամի (UNICEF) հայկական գրասենյակի և Համագործակցության եվրասիական հիմնադրամի օժանդակությամբ: -0-
