Հայաստանը ոչ ոքի թեկնածությունը չի դիտարկել Բաքվում կայանալիք «Եվրատեսիլ-2011» երգի միջազգային մրցույթին մասնակցելու համար, չորեքշաբթի «Նովոստի-Արմենիա» գործակալությանն է հայտնել Եվրատեսիլ մրցույթի հայկական պատվիրակության ղեկավար Գոհար Գասպարյանը:
Ավելի վաղ ԶԼՄ-ներում տեղեկություն էր հրապարակվել, որ ադրբեջանական կազմկոմիտեում մրցույթին մասնակցելու պաշտոնական հայտ է ներկայացրել 27 երկիր, և իբր Հայաստանի ներկայացուցիչ է ընտրվել երգչուհի Լուսիա Մունը (Lucia Moon), ով ծնվել է Բաքվում, իսկ այժմ բնակվում է Լոս Անջելեսում:
«Դա ադրբեջանական կողմից հերթական փիառ քայլն է: Հայաստանը դեռ չի կողմնորոշվել մրցույթի մասնակցության հարցում, հետևաբար մասնակիցների թեկնածությունները դեռ չեն քննարկվում»,- հայտնել է Գասպարյանը:
Նա նաև ընդգծել է, որ Լուսիա Մունը չի դիմել մրցույթին մասնակցելու համար:
Բաքուն «Եվրատեսիլ 2012» մրցույթը հյուրընկալելու հնարավորություն է ստացել՝ Դյուսելդորֆում 2011 թ.-ին կայացած միջազգային մրցույթում Նիքի (Նիգյար Ջամալ) և Էլլա (Էլդար Քասիմով) ադրբեջանական դուետի հաղթանակի շնորհիվ:
Ավելի վաղ Ադրբեջանի ԱԳՆ ղեկավարի տեղակալ Արազ Ազիմովը հայտարարել էր, որ իր երկիրը պատրաստ է ապահովել «Եվրատեսիլ-2012»-ի հայ մասնակիցների անվտանգությունը։
Սակայն հայկական կողմն անվտանգության լուրջ երաշխիքներ է ակնկալում Եվրոպայի հեռարձակման միությունից և Եվրատեսիլի անցկացման համար պատասխանատու միջազգային կազմակերպությունների կողմից։ -0-
