Մինչև տարեվերջ Մոսկվայի կենտրոնում Հայկական գրքի տուն կբացվի

ԵՐԵՎԱՆ, 17 հոկտեմբերի. /Նովոստի-Արմենիա/. Մինչև տարեվերջ Մոսկվայի Բասմաննայա 19 հասցեում (Սադովոյե կոլցոյի շրջանակներում) Հայկական գրքի տուն կբացվի, հաղորդում է ԱՊՀ երկրների երիտասարդական միության մամուլի ծառայությունը:

«Այն իր տեսքով, գտնվելու վայրով և հոգով համահունչ կլինի հոկտեմբերի 7-ին Երևանի կենտրոնում բացված Ռուսական գրքի տանը», - նշվում է տեղեկատվության մեջ:

Հայկական գրքի տան կազմում կգործի նաև «Արմենիա» մամուլի կենտրոնը, որը կհամագործակցի Երևանում գործող Ռուսական գրքի տան «Ռոսիա» մամուլի կենտրոնի հետ:

Մոսկվայում բացվող Հայկական գրքի տունը կզբաղվի «Ռուսաստանի հայկական աշխարհ» ամսագրի հրատարակմամբ: Տան շրջանակներում կանցկացվեն նաև հայերեն լեզվի դասընթացներ՝ նախատեսված տարիքային բոլոր խմբերի համար, կգործեն «Հայկական գիրք» խանութն ու քննարկումների ակումբը:

Ռուսաստանի քաղաքներում Հայկական գրքի տան բացման մասին որոշումը ընդունվել է հոկտեմբերի 1-ին ԱՊՀ երկրների երիտասարդական միության վարչության խորհրդի կողմից: Հիշեցնենք, որ հունիսին այդ խորհրդի նախագահի պաշտոնում ընտրվել է հասարակական գործիչ Անդրանիկ Նիկողոսյանը:-0-