Հայաստանում ակադեմիական արվեստը չի գնահատվում. Կամերային երգչախմբի գեղարվեստական ղեկավար

Հայաստանում ակադեմիական արվեստը պահանջարկ չունի, կարծում է ՀՀ պետական կամերային երգչախմբի գլխավոր դիրիժոր և գեղարվեստական ղեկավար Ռոբերտ Մլքեյանը:

«Մենք պետք է հասկանանք, թե ով է ազգային մշակույթի կրողը: Մենք մի փոքր խախտել ենք արժեքների համակարգը...Գլոբալ առումով մշակութային արժեքների կրողներն ակադեմիական արվեստը ներկայացնող և ազգային սեփականություն համարվող անհատներն ու կոլեկտիվներն են»,- չորեքշաբթի լրագրողներին ասաց Մլքեյանը:

Նա նշեց, որ այսօր հեռուստատեսությամբ ելույթ են ունենում էստրադային և ժողովրդական կատարողներ, ովքեր պարզապես չեն կարող ազգային և մշակութային արժեքների կրողներ լինել:

Մլքեյանն ընդգծեց, որ իրավիճակի բարելավման համար լուրջ և հետևողական քաղաքականություն է հարկավոր, ինչպես նաև մշտական պայքար՝ հայ մեծ կոմպոզիտորների ստեղծագործությունները քարոզելու համար:
Երգչախմբի տնօրեն Արմեն Արաբյանն իր հերթին ընդգծեց այդ հարցում ԶԼՄ-ների նշանակությունը, որոնք կարող ենք զգալի դեր խաղալ հայկական մշակութային արժեքների քարոզման հարցում: -0-