Նախօրեին երեկոյան HighFest միջազգային թատերական իններորդ փառատոնի շրջանակներում, Երևանում «Կրեդո» հայտնի բուլղարական թատրոնը ներկայացրել է սիրո մասին պատմող ձմռան հեքիաթ՝ «Հայրիկը միշտ ճիշտ է» վերնագրով:
Highfest փառատոնը հոկտեմբերի 1-8-ը անցկացվում է Երևանում: Այս տարի փառատոնին մասնակցում է աշխարհի 18 երկրներից շուրջ 30 թատերախումբ, մասնավորապես՝ Հայաստանի, Վրաստանի, Ռուսաստանի, Իրանի, Մեծ Բրիտանիայի, Ֆրանսիայի, Հնդկաստանի, Դանիայի, Իտալիայի, Հունգարիայի, Բուլղարիայի հայտնի կոլեկտիվներ:
«Հայրիկը միշտ ճիշտ է» պիեսը գրվել է թատրոնի հիմնադիրների և հեղինակների ՝ Նինա Դիմտրովա և Վասիլի Վասիլիևվ ամուսինների կողմից՝ մեծ հեքիաթասաց Հանս Քրիստիան Անդերսենի հեքիաթի մոտիվներով:
Պատմության հերոսը տարեց մի զույգ է, որը համբուրվում է ձմեռային տոնական օրը, և այդ համբույրն ինչ-որ շատ թանկ բանի է վերածվում...
«Դա մի պատմություն է, թե որքան հրաշալի է, երբ ամուսինը գիտի, թե ինչպես հաճելի պահեր պարգևի իր կնոջը, երբ ամուսինը գիտի, որ իր կնոջ համար նա ամենահրաշալի մարդն է, իսկ դա միայն այն դեպքում է հնարավոր, երբ երկուսը սիրում են միմյանց: Միայն այդ ժամանակ երկուսն էլ պատրաստ են փոխզիջումների գնալ»,- չորեքշաբթի մամուլի ասուլիսի ժամանակ ասաց Դիմտրովան:
Ինչպես ասաց Դիմիտրովան, չնայած հեքիաթում գործողությունն ամռանն է կատարվում, ըստ պիեսի պատմությունը ձմռանն է տեղի ունենում:
Տարվա եղանակի ընտրությունը նա բացատրեց նրանով, որ մեծ հեքիաթասացի գրեթե բոլոր ստեղծագործություններում շատ ձյուն և ցրտի զգացում կա, դրանցից են՝ «Լուցկիներով աղջիկը», «Սառցե թագուհին» և այլն:
Ըստ Դիմիտրովայի, ներկայացման պրեմիերան տեղի է ունեցել 2005թ.-ին Դանիայում՝ Անդերսենի ծննդյան օրվա առթիվ, այնուհետև պիեսը ցուցադրվել է Դանիայի 23 քաղաքներում:
Վասիլիևն իր հերթին պատմեց, որ ներկայացման աշխատանքների ընթացքում Նինան երազում հաճախ ձնագունդ է տեսել, և այդ պատճառով նրանց ընտրությունը կանգ է առել ձմռան տարբերակի վրա:
Նրանք ավելացրեցին, որ 2012թ.-ին իրենց թատրոնի 10-ամյակի կապակցությամբ ծրագրում են Նիկոլայ Գոգոլի «Խելագարի հիշատակարանը» վիպակի մոտիվներով պիես բեմադրել:
«Կրեդո» բուլղարական թատրոնը հիմնադրվել է 1992թ.-ին Սոֆիայում՝ Կինոյի և թատրոնի ազգային ակադեմիայի շրջանավարտներ, դերասաններ Նինո Դիմտրովայի և Վասիլի Վասիլիևի կողմից:
2009թ.-ին առաջին անգամ թատրոնը հանդես է եկել HighFest փառատոնի շրջանակներում և ներկայացրել է իր առաջին աշխատանքը՝ Գոգոլի «Շինելը», որն նրանց միջազգային ճանաչում էր բերել:
Highfest փառատոնի շրջանակներում ներկայացումները կանցկացվեն Տիկնիկային թատրոնի, Կամերային թատրոնի, Երիտասարդական փորձարարական թատրոնի, Պետական համազգային թատրոնի, Ստանիսլավսկու անվան ռուսական պետական թարտոնի, ինչպես նաև ՆՓԱԿ-ի բեմերում:
Highfest միջազգային թատերական փառատոնն առաջին անգամ Հայաստանում անցկացվել է 2003թ.-ին: Փառատոնն այնպիսի միջազգային թատերական ցանցերի անդամ է, ինչպիսին են Մանկապատանեկան թատրոնի միջազգային ասոցիացիան (ASSITEJ) և Կատարողական արվեստի միջազգային ցանցը (IETM): -0-
