ԵՐԵՎԱՆ, 20 սեպտեմբերի. /Նովոստի-Արմենիա/. Երևանի «Նաիրի» կինոթատրոնի կինոցուցադրությունների կենտրոնը կգործի 2012 թվականի հունվարի 15-ից, «Նովոստի-Արմենիա» գործակալությանը հայտնեց Հայաստանի Ազգային կինոկենտրոնի մամուլի քարտուղար Ռուզան Բագրատունյանը:
Մի քանի ամիս առաջ «Նաիրի» ամենահին կինոթատրոնը վաճառվել է նոր սեփականտիրոջ և դադարել է գործել ըստ նշանակության: Այժմ այնտեղ գործում է տեղական բանկերից մեկի մասնաճյուղը: Սակայն վերջերս Կինոկենտրոնի տնօրեն Գևորգ Գևորգյանը հայտարարեց, որ կինոկենտրոնը մտադիր է սեփականատիրոջ հետ իրավաբանորեն ձևակերպել կինոդահլիճի վարձակալության դիմաց խորհրդանշական վճարի հնարավորություն, ինչը կինոթատրոնին մասամբ գործելու հնարավորություն կտա:
Ըստ նրա, նախնական պայմանավորվածության համաձայն, այժմ իրականացվում է օրական մեկ-երկու ֆիլմերի ցուցադրություն:
Բագրատունյանն ասաց, որ Հայաստանի քաղաքապետարանը և Կրթության և գիտության նախարարությունը խոստացել են օժանդակություն ցուցաբերել կենտրոնի շահագործման հարցում, և շուտով նախատեսվում է այդ առիթով համապատասխան համաձայնագրի ստորագրում:
Նա նշեց նաև, որ կինոցուցադրությունների ծրագիրը բաղկացած կլինի երեք մասից` «Մանկական (դպրոցական) ծրագիր», «Հայկական ժամանակակից ֆիլմեր» և «Արտասահմանյան կինո»:
Բացի այդ, Բագրատունյանի խոսքով, ծրագրվում է նաև բաժանորդագրերի համակարգ ներդնել դպրոցականների համար:
Ազգային կինոկենտրոնի մամուլի քարտուղարն ավելացրեց, որ հունվարից, բացի հայրենական ֆիլմերից, նախատեսվում են նաև համաշխարհային կինեմատոգրաֆի գլուխգործոցների ցուցադրություններ:
«Նաիրի» կինոթատրոնն ամենահինն է Երևանում և գործում է 1920 թվականից: Այս կինոթատրոնում է կայացել Համո Բեկնազարյանի նկարահանած «Զարե» առաջին հայկական ֆիլմի պրեմիերան:--0-
