Highfest փառատոնի շրջանակներում Երևանում առաջին անգամ 3D ձևաչափով ինքնատիպ բրիտանական ներկայացում կցուցադրեն

Ռեժիսոր Բիլ Քոուի բեմադրած «Մենության տանգո» յուրօրինակ ներկայացումը կներկայացվի Highfest միջազգային թատերական իններորդ փառատոնի շրջանակներում, որը կանցկացվի հոկտեմբերի 1-8-ը Երևանում, ասաց փառատոնի նախագահ Արթուր Ղուկասյանը:

«Ներկայացումը կտևի ութ րոպե և կներկայացվի ամեն օր ժամը 16:00-18:00-ը Թումանյանի անվան պետական տիկնիկային թատրոնում»,- ուրբաթ ասուլիսի ժամանակ ասաց Ղուկասյանը:

Նա նշեց, որ բացի այդ, փառատոնի շրջանակներում ռեժիսոր Բիլ Քոուն հայ թատերական գործիչների համար 3D ներկայացումների վերաբերյալ վարպետության դասեր կանցկացնի:

Ղուկասյանն ավելացրեց, որ այս տարի թատերական փառատոնի շրջանակներում  ներկայացումը ցուցադրվել է Էդինբուրգում:
Highfest միջազգային թատերական փառատոնն առաջին անգամ Հայաստանում անցկացվել է 2003թ.-ին: Փառատոնն այնպիսի միջազգային թատերական ցանցերի անդամ է, ինչպիսին են Մանկապատանեկան թատրոնի միջազգային ասոցիացիան (ASSITEJ) և Կատարողական արվեստի միջազգային ցանցը (IETM):  -0-