«Միմինո» ֆիլմի լեգենդար հերոսներին կհավերժացնեն Թբիլիսիում

Գեորգի Դանելիայի «Միմինո» խորհրդային կատակերգության լեգենդար հերոսները կհավերժանան Թբիլիսիում, երեքշաբթի տեղեկացրել է թատրոնի և կինոյի հայտնի դերասան Վախթանգ Կիկաբիձեի պրոդյուսեր Սոսո Աբզիանիձեն:

Ինչպես հաղորդում են ռուսական ԶԼՄ-ները, Աբզիանիձեն նշել է, որ հուշարձանի բացումը, որը կտեղադրվի Թբիլիսիի հայաբնակ շրջանում՝ Հավլաբարում, տեղի կունենա 2011 թ.-ի հոկտեմբերի 14-ին:

Նա տեղեկացրել է, որ հուշարձանը բաղկացած կլինի հայտնի ֆիլմի հերոսների՝ Վալիկո Միզանդարիի (Միմինո), ում մարմնավորել է Վախթանգ Կիկաբիձեն, Ռուբիկ Խաչիկյանի՝ Ֆրունզիկ Մկրտչյանի կատարմամբ և Իվան Վոլոխովի՝ Եվգենի Լեոնովի կատարմամբ, ինչպես նաև ֆիլմի ռեժիսոր Գեորգի Դանելիայի հուշարձաններից:

Հուշարձանի հեղինակն է հայտնի ռուսաստանաբնակ վրացի քանդակագործ Զուրաբ Ծերեթելին:

Գեորգի Դանելիայի այս լեգենդար ֆիլմի հուշարձանն արդեն բացվել է Ռուսաստանում: Այն գտնվում է Մոսկվայում՝ Ժամանակակից արվեստների թանգարանի տարածքում:

Հուլիսին 6-ին ֆիլմի հերոսների հուշարձանի բացումը տեղի է ունեցել Դիլիջանում: Ֆրունզիկ Մկրտչյանի, Վախթանգ Կիկաբիձեի և Եվգենի Լեոնովի բրոնզե արձանները խորհրդանշում են երեք հարևան երկրների՝ Հայաստանի, Վրաստանի և Ռուսաստանի բարեկամությունը: Դա պարզապես հուշարձան չէ, այլ նաև շատրվան։ Ճարտարապետներն ասում են՝ արվեստի կենարար ուժը ստեղծվում է միայն համատեղ աշխատանքով։ -0-