«Երգեհոն պլյուս» փառատոնը և Միքայել Թարիվերդիևի անվան երգեհոնահարների միջազգային մրցույթը մեկնարկում է երեքշաբթի Կալինինգրադում, հաղորդում է ՌԻԱ Նովոստին՝ հղում անելով մարզի ֆիլհարմոնիայի մամուլի ծառայությանը։
Մրցույթի բացման օրը Կալինինգրադի մարզի ֆիլհարմոնիայի դահլիճում տեղի կունենա գալա համերգ, որի ծրագրում երգեհոնի և տարբեր գործիքակազմերի համար հատուկ պատրաստված ստեղծագործություններ կհնչեն։
Համերգի շրջանակներում տեղի կունենա Վաչե Շառաֆյանի ստեղծագործության համաշխարհային պրեմիերան, որը գրվել է դուդուկի և «Տերեմ-քառյակի» համար՝ հատուկ այդ արարողության համար: Ծրագիրը ներկայացնում է աշխարհում ժողգործիքների և երգեհոնի համադրման առաջին փորձը, այն պատրաստ է և հատուկ այդ համերգի համար գործիքավորվել է երաժիշտների կողմից։
«2011թ.-ին մրցույթը համընկնում է Միքայել Թարիվերդիևի հոբելյանի հետ. օգոստոսի 15-ին լրացավ նրա 80-ամյակը... Այս տարի մրցույթին ռեկորդային քանակությամբ հայտ է ներկայացվել՝ 52, կմասնակցեն 26 երկրից ժամանած երաժիշտներ»,-ասվում է հաղորդագրության մեջ։
Ընտրական փուլերն արդեն անցել են Կանզասում (ԱՄՆ), Համբուրգում (Գերմանիա)։ Սեպտեմբերի 1-3-ն առաջին փուլի մրցութային լսումները կայացել են Ղազախստանի մայրաքաղաք Աստանայում։
Երգեհոնահարների մրցակցության մոսկովյան փուլն անցել է օգոստոսի 30-ից մինչև սեպտեմբերի 2-ը։ Կիսաեզրափակիչ և եզրափակիչ փուլն ավանդաբար կանցկացվի Կալինինգրադում, դրան կմասնակցեն ընտրական փուլերն անցած երաժիշտները։
Կսկսվեն մրցութային լսումները, որոնց կմասնակցեն 22 երգեհոնահարներ, սեպտեմբերի 7-ին ֆիլհարմոնիայի համերգային դահլիճում, իսկ սեպտեմբերի 10-ին երրորդ փուլի լսումները տեղի կունենան Մայր տաճարում։
Երգեհոնահարների փառատոնը և մրցույթը կավարտվի սեպտեմբերի 11-ին. հաղթողներին և համերգի դափնեկիրներին մրցանակներ կշնորհվեն։ -0-
