Մ. Թարիվերդիևի անվան երգեհոնահարների միջազգային մրցույթը, որի ընտրական փուլն արդեն անցել է ԱՄՆ-ում և Եվրոպայում, սկսում է երաժիշտների մոսկովյան մրցումները, որոնք կանցկացվեն Գլինկայի անվան Երաժշտական մշակույթի թանգարանում օգոստոսի 30- և 31-ին, «ՌԻԱ Նովոստիին» հայտնել է նախագծի մամուլի քարտուղար Տատյանա Մագդան։
«Մասնակցության հայտ են ներկայացրել 11 երգեհոնահարներ Էստոնիայից, Ֆինլանդիայից, Ֆրանսիայից, Հայաստանից և Ռուսաստանից»,- նշել է գործակալության զրուցակիցը։
Ընտրական հաջորդ կետն Աստանան է, այնտեղ մրցումները կանցկացվեն սեպտեմբերի 1-3-ը։ Հայտնի է, որ այնտեղ իրենց վարպետությունն են պատրաստ ցուցադրել ինը երգեհոնահարներ Ղազախստանից, Ճապոնիայից, Կորեայից, Հունաստանից և Ռուսաստանից։ Միաժամանակ առաջին փուլի վերջին օրն այնտեղ կանցկացվի Չինգիզ Այթմատովի հիշատակին նվիրված համերգ «Ազը և Ես», որը կներկայացնի ասիական մոտիվներով երգեհոնային երաժշտության ծրագիր։
ԱՄՆ-ի և Եվրոպայի առաջին ընտրական փուլի արդյունքներով հետագա մասնակցության են թույլատրվել 30 հայտատուներից 14 երգեհոնահարներ։
Եզրափակիչ երկրորդ և երրորդ փուլերն ըստ ավանդույթի կանցկացվեն Կալինինգրադում սեպտեմբերի 6-11-ը։ Առաջին մրցանակակիրը կստանա հինգ հազար դոլար, երկրորդը՝ երեք հազար դոլար, երրորդը՝ երկու հազար դոլար։ Հազարական դոլար կստանան նաև երկու դիպլոմակիրներ և «Թարիվերդիևի ստեղծագործությունների լավագույն կատարման համար» հատուկ մրցանակակիրը։ Նրանց կարելի է տեսնել սեպտեմբերի 15-ին՝ մրցույթի փակման հանդիսավոր արարողության և Կալինինգրադի տաճարում մրցույթի դափնեկիրների համերգի ինտերնետային օնլայն հեռարձակման ժամանակ։
Ինչպես ավելի վաղ հայտնել էր կոմպոզիտորի այրի Վերա Թարիվերդիևան, երկու տարին մեկ անգամ անցկացվող իր ամուսնու անվան մրցույթը թափ է հավաքում, թեև երգոհանային երաժշտության կատարողներն աշխարհում այնքան էլ շատ չեն։ Այսպես, այս տարի ստացվել է 52 հայտ նախորդ անգամի 48-ի դիմաց, մինչդեռ Բուդապեշտի Ֆ. Լիստի անվան երգեհոնային մրցույթի կազմակերպիչները ստիպված են եղել չեղյալ հայտարարել այն՝ մրցույթի մասնակիցների կողմից հետաքրքրության բացակայության պատճառով։
Թարիվերդիևի 80-ամյա հոբելյանի կապակցությամբ այս տարի ոչ միայն մրցույթ, այլ նաև բազմաթիվ համերգներ են անցնում ողջ երկրում։ Այսպես, Կալինինգրադում երգեհոնահարների մրցույթին զուգընթաց կանցկացվի նաև «Երգեհոն պլյուս» փառատոնը։ Մրցույթի և փառատոնի բացմանը նվիրված գալա համերգը տեղի կունենա սեպտեմբերի 6-ին՝ Կալինինգրադի ֆիլհարմոնիայի համերգասրահում։
Երեկոյին կմասնակցեն նաև «Տերեմ-քառյակը», որը կներկայացնի հատուկ բացման համար կոմպոզիտոր Վաչե Շառաֆյանի կողմից գրված ստեղծագործության համաշխարհային պրեմիերան, ինչպես նաև ճապոնական «Խիդե-Խիդե» դուետը, հայ դուդուկահար Գևորգ Դաբաղյանը, թավջութակահար Ռուստամ Կոմաչկովը և շատ ուրիշներ։
Դեկտեմբերի 19-ին Եկատերինբուրգում ծրագրվում է համերգ, որի ժամանակ կկայանա Թարիվերդիևի ջութակի երկրորդ կոնցերտի համաշխարհային պրեմիերան Ուրալի կոնսերվատորիայի Սիմֆոնիկ նվագախմբի կատարմամբ։ -0-
