ՌԴ մշակույթի նախարարությունը Գորենշտեյնի նվագախմբի հետ կապված իրավիճակը կլուծի նրա ապաքինումից հետո

ԵՐԵՎԱՆ, 24 օգոստոսի. /Նովոստի-Արմենիա/. ՌԴ մշակույթի նախարարությունը կլուծի Ռուսաստանի Սվետլանովի անվան պետական ակադեմիական սիմֆոնիկ նվագախմբում տիրող իրավիճակն այն բանից հետո, երբ կավարտվի նվագախմբի գլխավոր դիրիժոր Մարկ Գորենշտեյնի` հիվանդության հետ կապված բացակայությունը: Նվագախմբի երաժիշտները գերատեսչությանը նամակ են հղել, որում հրաժարվել են իրենց գլխավոր դիրիժոր Մարկ Գորենշտեյնի հետ աշխատանքը շարունակելուց, «ՌԻԱ Նովոստիին» տեղեկացրել է ՌԴ մշակույթի նախարարության մամուլի քարտուղար Նատալյա Ուվարովան:

Պետական ակադեմիական սիմֆոնիկ նվագախմբի երաժիշտները նամակ են հղել ՌԴ մշակույթի նախարար Ալեքսանդր Ավդեևին, որում նշվում է, որ նվագախմբում տիրող իրավիճակը «հասել է գագաթնակետին»: Մասնավորապես, երաժիշտները նշում են Գորենշտեյնի ոչ կոռեկտ վերաբերմունքը, նրանք նշում են, որ վերջին մի քանի տարվա ընթացքում կոլեկտիվից շուրջ 280 պրոֆեսիոնալ երաժիշտ է հեռացել:

«Նախարարությունը նման նամակ է ստացել, և մենք ծանոթացել ենք նամակի հետ: Ավելին, օգոստոսի 16-ին ՌԴ մշակույթի փոխնախարարը հանդիպել է նվագախմբի գեղարվեստական խորհրդի հետ և նրանց հետ քննարկել է նվագախմբում տիրող խնդրահարույց իրավիճակը», - նշել է Ուվարովան:

Նա հավաստիացրել է, որ «մշակույթի նախարարությունը հետևում է այս իրավիճակին»:

«Մարկ Գորենշտեյնն այս պահին առողջության հետ կապված խնդիրների պատճառով մինչև օգոստոսի 26-ը աշխատանքի չի գալու: Նրա ապաքինումից հետո նախարարության ղեկավարությունն, իհարկե, կհանդիպի նրա հետ և կլուծի այս իրավիճակը: Նախարարությունը մի քանի նամակ է ստացել Գորենշտեյնից, սակայն նրա հետ անձամբ ոչ ոք չի հանդիպել և չի զրուցել», - նշել է ՌԴ մշակույթի նախարարության մամուլի քարտուղարը:

Չայկովսկու անվան մրցույթի ժամանակ Մարկ Գորենշտեյնը սկանդալի կենտրոնում էր հայտնվել. բաց փորձի ժամանակ դիրիժորն իր կոլեկտիվի երաժիշտների հետ զրույցի ժամանակ մրցույթի մասնակիցներից մեկին՝ Հախնազարյանին, անվանել էր «այս աուլը»: Մրցույթի կազմկոմիտեն վրդովեցուցիչ էր համարել մաեստրոյի խոսքերը: Պետական ակադեմիական սիմֆոնիկ նվագախմբի տեղեկատվության համաձայն՝ հասարակական լայն արձագանքից հետո Գորենշտեյնը ներողություն էր խնդրել երաժշտից, ով ընդունել էր դրանք: Այս ամենից հետո մրցույթի ժամանակ Գորենշտեյնին փոխարինել էին, քանի որ նա առողջական խնդիրների պատճառով չէր մասնակցում մրցույթի աշխատանքներին:

2011 թ.-ի սեպտեմբերին կլրանա նվագախմբի 75-ամյակը:-0-