Հայտնի ֆրանսիացի շանսոնյե Շառլ Ազնավուրը 87 տարեկանում նոր էջ է բացում իր ստեղծագործական կենսագրությունում: Օգոստոսի վերջին լույս կտեսնի նրա հերթական սկավառակը «Ազնավուրն ընդմիշտ» մարգարեական անվանմամբ, որում ներկայացված է 12 նոր երգ, գրում է «Իզվեստիա» թերթը:
«Դոն Կիխոտ» հրատարակությունը միաժամանակ հրապարակում է Ազնավուրի նոր գիրքը՝ «Մեկ դռնից մյուսը»: Իսկ սեպտեմբերի 7-ին երգիչը կվերադառնա Փարիզի «Օլիմպիա» հնագույն դահլիճի բեմ, որտեղ նա ավելի քան երեք տասնամյակ ելույթ չի ունեցել:
Հոկտեմբերի կեսին Ազնավուրը հյուրախաղեր կունենա Ֆրանսիայում: Այնուհետև կշարունակի իր հյուրախաղերը Լատինական Ամերիկայում, Կանադայում և հնարավոր է՝ ողջ աշխարհում: ԱՄՆ-ում CNN հեռուստաալիքն ու «Time online» ամսագրի ընթերցողները նրան ճանաչել են նախորդ դարաշրջանի «վարյետեի արտիստ»: Առաջին տեղի համար մղվող պայքարում Ազնավուրն առաջ է անցել շոու-բիզնեսի այնպիսի հսկաներից, ինչպիսիք են Ֆրենկ Սինատրան և Էլվիս Փրեսլին:
Շանսոնյեն պատրաստվում է իր ելույթներին Ավինյոնի մոտակայքում գտնվող կալվածքում, որտեղ ապրում է զավակների և թոռների շրջապատում: «Ես կմեռնեի թախծից, եթե այլևս չկարողանայի երգեր գրել», - նշում է օրը 11 ժամ աշխատող արտիստը: «Կցանկանայի գրել նաև այլ երգիչների համար կամ աջակցել նոր տաղանդների: Հեռուստահաղորդման նախագիծ եմ մշակում, որի շրջանակներում դեբյուտանտները կկատարեն հայտնի ֆրանսիական երգեր»:
Նրա կալվածատանը օրը սկսվում է առավոտյան 7-ին: Առաջին տեղում լողավազանն է: Նախաճաշից հետո Շառլը նստում է գրասեղանի առջև: Երգեր գրելը նա համեմատում է մկանի հետ, որը պետք է մշտապես մարզել:-0-
