Ռուս երաժիշտները բարեգործական ակցիա կանցկացնեն հայ երեխաներին օգնելու համար

Ռուս երաժիշտները չորեքշաբթի Երևանում համերգ կանցկացնեն «Ռուս երաժիշտները՝ հայ երեխաներին» բարեգործական ակցիայի շրջանակներում, երեքշաբթի լրագրողներին հայտնեց Երևանում Ռուսական արվեստի թանգարանի մամուլի քարտուղար Հասմիկ Իսագուլյանը:

«Երաժիշտները 40 րոպեանոց համերգ կտան, որից հետո տեղի կունենա երաժշտական գործիքների հանդիսավոր հանձնում № 13 երաժշտական գիշերօթիկ դպրոցում ապրող և սովորող հայ երեխաներին»,- հայտնեց Իսագուլյանը:

Բարեգործական ակցիան անցկացվում է արդեն երկրորդ տարին, ակցիային մասնակցում են Յուրի Բաշմետի ղեկավարությամբ «Նոր Ռուսաստան» պետական ֆիլհարմոնիկ նվագախմբի երաժիշտները, ինչպես նաև նրանց իսպանացի և ֆրանսիացի գործընկերները:

«Հատուկ շնորհակալություն ենք ուզում հայտնել Ֆելիքս Կորոբովին, Մոսկվայի Կ.Ս. Ստանիսլավսկու և Վ.Ի. Նեմիրովիչ Դանչենկոյի անվան երաժշտական թատրոնի դիրիժորին, ով երեխաներին երկու ֆլեյտա է նվիրել, ինչպես նաև Ֆիլիպ Նոդելին երկու հոբոյ նվիրելու համար, որոնք նրան էին փոխանցել ֆրանսիացի գործընկերները»,- մամուլի ասուլիսի ժամանակ ասաց ակցիայի մասնակից, դաշնակահարուհի Աննա Գրիշինան:

Բացի այդ, ակցիայի մասնակիցներն իրենց երախտագիտությունն են հայտնել հայտնի սոպրանո Աննա Սամուիլին, ով արդեն երկու տարի է՝ հովանավորում է Երևանի երաժշտական դպրոց-ինտերնատը:
«Մեր հիմնական խնդիրն այդ երեխաներին փողային գործիքներ նվագելու հնարավորություն տրամադրելն է, որը մենք չենք ունեցել, և հուսով ենք, որ շուտով դպրոցում ֆագոտի և հոբոյի դասարաններ կբացվեն»,- նշեց ակցիայի մասնակից, ջութակահար Սոնա Ազարյանը:

Թիվ 13 փողային գործիքների երաժշտական գիշերօթիկ դպրոցը ստեղծվել է 1937թ.-ին Սուխումի քաղաքում՝ քաղաքացիական պատերազմի տարիներին: Հատուկ ռազմական փողային նվագախմբերի համար անօթևան երեխաներից երաժիշտներ էին դարձնում: Ավելի ուշ 1943թ.-ին դպրոցը տեղափոխվել է Երևան և մինչ օրս գործում է Հայաստանում: Դպրոցն իր նշանակությամբ երրորդ տեղն է զբաղեցրել ԽՍՀՄ տարածքում, դպրոցի շատ շրջանավարտներ նվագում են աշխարհի ամենահայտնի նվագախմբերում: -0-