Հայ երգիչը «Նոր ալիք» մրցույթում «Հանդիսատեսի համակրանք» մրցանակին է արժանացել

Հայ երգիչ Էրիկը «Հանդիսատեսի համակրանք» մրցանակի և ադամանդե արձանիկի է արժանացել կիրակի Յուրմալայում ավարտված «Նոր ալիք» մրցույթում:

«Նոր ալիք» 10-րդ մրցույթի հաղթող է ճանաչվել ԱՄՆ-ն ներկայացնող Ջեյդեն Ֆելդերը, ով արժանացել է 50 հազար եվրոյի, երկրորդ տեղը զբաղեցրել է Ուկրաինան ներկայացնող Մաշա Սոբկոն (30 հազար եվրո), երրորդ տեղը զբաղեցրել է Ռուսաստանը ներկայացնող «Н.А.О.М.И» խումբը (20 հազար եվրո), հաղորդում է ՌԻԱ Նովոստին:

Մրցույթի մուսա Ալլա Պուգաչովայի հատուկ մրցանակը՝ Ալլայի ոսկե աստղն ու 50 հազար եվրո ստացավ Ֆինլանդիան ներկայացնող Flute of Shame տրիոն:

Flute of Shame տրիոն և Ղազախստանը ներկայացնող «Ա-լաու» դուետն արժանացան Յուրմալայի քաղաքային դումայի հատուկ մրցանակին: Մրցույթի լավագույն դիզայներ ճանաչվեց Ալինա Գերմանը, ով աշխատել է ռուսական «Н.А.О.М.И» խմբի զգեստների վրա:
Մրցույթին մասնակցել է 14 երկիր ներկայացնող 16 կատարող:

Մրցույթի մասնակիցները մրցում էին երեք կատեգորիաներում՝ «Երկրի հիթ», «Համաշխարհային հիթ» և «Օրիգինալ երգ»:

«Նոր ալիքն» ամեն տարի թույլ է տալիս հանդիսատեսին և միլիոնավոր հեռուստադիտողներին բացահայտել նոր տաղանդներ, որոնցից ոմանք ժամանակի ընթացքում իսկապես հայտնի արտիստներ են դառնում: Մրցույթի ժյուրիի համանախագահներն են կոմպոզիտորներ Իգոր Կրուտոյն ու Ռայմոնդ Պաուլսը:

Տարբեր տարիներին «Նոր ալիքը» «բացահայտել» է Դիմա Բիլանին,  Smash դուետին, Անաստասիա Ստոցկայային, Իրինա Դուբցովային, Պոլինա Գագարինային, վրացուհի Սոֆիկոյին և երգիչ Ինտարս Բուսուլիսային, ով 2009 թ.-ին ներկայացրեց Լատվիան «Եվրատեսիլ» մրցույթում:-0-