ԱՐՄՄՈՆՈ միջազգային թատերական փառատոնը կանցկացվի Ղարաբաղում հուլիսի 18-22-ը, հաղորդում է փառատոնի մամուլի ծառայությունը:
Փառատոնը նվիրված է Արցախի հռչակման 20-ամյակին և կանցնի Հայաստանի մշակույթի և սփյուռքի նախարարությունների, ԼՂՀ մշակույթի, սպորտի և երիտասարդության հարցերի նախարարության աջակցությամբ:
Հինգ օրերի ընթացքում ԼՂՀ տարբեր քաղաքներում կներկայացվի 18 ներկայացում, որոնցից ստացված եկամուտը ամբողջությամբ տրամադրվելու է Ստեփանակերտի Վահրամ Փափազյանի անվան թատրոնի վերանորոգման աշխատանքներին:
Ղարաբաղում նախատեսված փառատոնի խաղացանկում ներառված են հետևյալ ներկայացումները՝ Սամվել Բաղինյանի «Մատյան ողբերգության», Հովհաննես Հովհաննիսյանի «Շեյլոկ», Ռոբերտ Հակոբյանի «Ձեզ եմ դիմում տիկնայք ու պարոնայք», Գենադի Առուշանյանի «Ես տեսնում եմ ձեզ», Գրետա Մեջլումյանի «Ծառերը», Զարուհի Խաչատրյանի «Վերադառնում են, մոռացեք», Արթուր Կարապետյանի «Յագո» և Արմեն Սանթրոսյանի «Լիր»:
ԱՐՄՄՈՆՈ փառատոնն անցկացվում է ՀՀ ԱԺ խոսնակ Հովիկ Աբրահամյանի հովանու ներքո՝ ՀՀ մշակույթի նախարարության և Հայաստանի թատերական գործիչների միության աջակցությամբ:
ԱՐՄՄՈՆՈ միջազգային թատերական փառատոնն առաջին անգամ անցկացվել է Երևանում 2003թ.-ի սեպտեմբերին:-0-
