Կաննի միջազգային կինոփառատոնի գլխավոր մրցանակին՝ «Ոսկե արմավենուն» արժանացած ռեժիսոր Տերենս Մալիկի «Կենաց ծառ» ֆիլմը կցուցադրվի հայ հանդիսատեսին «Ոսկե ծիրան» միջազգային կինոփառատոնի շրջանակներում, հաղորդում է կինոփառատոնի մամուլի ծառայությունը:
Տեղեկատվության համաձայն, ֆիլմը կցուցադրվի երևանյան պրեմիերաների շարքում:
Թվով ութերորդ «Ոսկե ծիրանը» կանցնի Երևանում հուլիսի 10-17-ը:
Հռչակավոր ամերիկացի ռեժիսորը երկարատև բանակցություններից հետո համաձայնել է ցուցադրել իր ֆիլմը Երևանում, նշվում է տեղեկատվության մեջ:
Մալիկն իր 40-ամյա կինոկարիերայի ընթացքում նկարահանել է ընդամենը 4 ֆիլմ, սակայն չորսն էլ արժանացել են բարձր գնահատականի: Կաննում մրցանակի հանձմանը ռեժիսորը ներկա չի եղել. նա երբեք չի հանդիպում լրագրողների հետ և չի մասնակցում կինոփառատոներին:
«Կենաց ծառ» երևակայական դրաման մի ընտանիքի պատմություն է, որում խոսվում է տիեզերքի, մարդկային հարաբերությունների և ընտանեկան արժեքների մասին: 11-ամյա Ջեքը 1950-ականների Միջին Արևմուտքի հասարակ ընտանիքի ավագ որդին է: Գլխավոր դերերում նկարահանվել են ամերիկյան կինոյի հայտնի դերասաններ՝ Բրեդ Փիթն ու Շոն Պենը:
«Ոսկե ծիրան» ամենամյա միջազգային կինոփառատոնը ամենահեղինակավորներից մեկն է տարածաշրջանում: Այն անցկացվում է 2004 թվականից: 2011 թ.-ին «Ոսկե ծիրան» փառատոնին շուրջ 630 մասնակցության հայտ է ստացվել աշխարհի 81 երկրներից, որոնցից ընտրվել է 150 հայտ 45 երկրից:
2010թ.-ին փառատոնն արժանացել է Կինոյի միջազգային միության, « Ficts Plate D’honneur 2010» հեռուստատեսության և սպորտի գլխավոր մրցանակին: -0-
