Ազգային կինոակադեմիա է հիմնվել Հայաստանում
Հայաստանի Ազգային նորաստեղծ կինոակադեմիան կմիավորի կինոարվեստով զբաղվող բոլոր կազմակերպությունները, հայտարարեց կինոակադեմիայի նախագահ, կինոգետ Դավիթ Մուրադյանը։
«Այսօր մենք ունենք Հայաստանի կինեմատոգրաֆիստների միություն, «Ոսկե ծիրան» կինոփառատոնի հիմնադրամ և Հայաստանի ազգային կինոկենտրոն՝ դրանք բոլորը կատարում են իրենց կարևոր աշխատանքը, սակայն անհրաժեշտ է մի մարմին, որը կմիավորի այս բոլոր կառույցները հօգուտ հայ կինեմատոգրաֆի»,- երկուշաբթի լրագրողներին հայտնեց Մուրադյանը։
Ըստ նրա, Ազգային կինոակադեմիան հայկական կինոգործիչների հետ համագործակցությամբ մտադիր է կապեր հաստատել եվրոպական, ամերիկյան, ռուսական համանման կազմակերպությունների հետ, զբաղվել գիտական հետազոտություններով, ակադեմիկ մակարդակի համաժողովներ և սեմինարներ կազմակերպել։
Մուրադյանը հայտնեց, որ կանոնադրության համաձայն, կինոակադեմիայի անդամ կարող են դառնալ մարդիկ, ովքեր կինեմատոգրաֆի ոլորտում առնվազն 10-ամյա փորձ ունեն, որոշակի ճանաչման են հասել, օրինակ, միջազգային մրցանակների դափնեկիրներ, պետական մրցանակակիրներ։ «Այսինքն, Ազգային կինոակադեմիան կդառնա հայկական կինեմատոգրաֆի ինտելեկտուալ և գեղարվեստական միջուկը»,- ասաց Մուրադյանը։
Նա ընդգծեց, որ կինոակադեմիայի ղեկավարությունը որոշել է հիմնել իր հատուկ մրցանակը։
«Կինոակադեմիայի մրցանակը կբաշխվի երկու տարին մեկ անգամ, որպեսզի ապահովի մրցունակ ֆիլմերի անհրաժեշտ քանակը»,- ասաց Մուրադյանը, հավելելով, որ մրցանակի անվանումն առայժմ անորոշ է։
Նորաստեղծ կազմակերպության առաջին նախաձեռնությունների թվում Մուրադյանը նշեց «Ոսկե ծիրան» հիմնադրամի հետ համատեղ հայկական կինոյի հանրագիտարանի ստեղծումը, «Ոսկե ծիրան» փառատոնի շրջանակներում «Գեղարվեստական հատուկ հայացք» խորագրով հատուկ մրցանակի հիմնումը, ինչպես նաև «Հույս» մրցանակի ստեղծումը Երիտասարդ կինեմատոգրաֆիստների «Ես» փառատոնում։
Ինչպես կարծում է Մուրադյանը, Հայկական ազգային կինոակադեմիայի ստեղծումը հենց այս պահին անհրաժեշտություն էր մի շարք պատճառներով՝ նախևառաջ, այն երկարամյա ճանապարհը գնահատելու համար, որ անցել է հայկական կինեմատոգրաֆը։ «2012 թվականին մենք կնշենք հայկական կինեմատոգրաֆի 100-ամյակը»,- ասաց նա, հիշեցնելով, որ հայկական կինոյի մասին հիշատակումներ են հանդիպում Եգիպտոսի 1912 թվականի անգլիալեզու մամուլում։
Առաջիկա նշանակալի իրադարձությունների թվում նա նշեց անկախության ժամանակահատվածի հայկական կինոյի 20-ամյակը, որը լրանում է 2012 թվականին։ «Այդ թվերը պետք է ըստ արժանվույն նշել»,- վստահ է նա։ -0-
