Կառավարության որոշմամբ Մինասի որմնանկարները Գյումրիից տեղափոխվում են Երևան. ՀՀ մշակույթի նախարարություն

Մեծանուն հայ նկարիչ Մինաս Ավետիսյանի որմնանկարների տեղափոխումն իրականացվում է կառավարության որոշման համաձայն, հինգշաբթի «Նովոստի-Արմենիա» գործակալությանը հայտարարեց ՀՀ մշակույթի նախարարության մամուլի քարտուղար Գայանե Դուրգարյանը:

2010 թ.-ին Մինասի երկու որմնանկարները վերականգնվել և տեղափոխվել են ՀՀ կառավարության շենք, ինչն արժանացել է գյումրեցիների դրական արձագանքին:

Սակայն մեծանուն վարպետի ևս երկու որմնանկար Երևանի «Զվարթնոց» օդանավակայան տեղափոխելու մասին ՀՀ կառավարության մտադրությունը մեծ դժգոհություն է առաջացրել գյումրեցի մշակույթի գործիչների, մտավորականության, հասարակական կազմակերպությունների շրջանում, որոնք ցանկանում են, որպեսզի Մինասի աշխատանքները մնան Շիրակի մարզում:

«Շիրակ» ՀԿ-ի տեղեկատվության համաձայն, չորեքշաբթի և հինգշաբթի Մինասի «Թել են մանում» և «Երկանք» որմնանկարները իտալացի ռեստավրատորների մասնակցությամբ գործարանի պատերից ապամոնտաժման են ենթարկվել, ինչը գյումրեցիների բուռն բողոքի պատճառ է դարձել:

Դուրգարյանի խոսքով՝ ՀՀ մշակույթի նախարարությունն առաջարկել է գյումրեցիներին, որպեսզի իրենք հոգ տանեն քաղաքում գտնվող շուրջ ութ որմնանկարների մասին, ովքեր ռեստավրացիայի խիստ կարիք ունեն: Սակայն դրան ի պատասխան կոնկրետ առաջարկներ չեն ստացվել:

Ինչպես նշվում է «Շիրակ» ՀԿ-ի տեղեկատվության մեջ, հազարավոր գյումրեցիներ ստորագրել են ՀՀ մշակույթի նախարար Հասմիկ Պողոսյանին ուղղված նամակի տակ՝ խնդրելով որմնանկարների վերականգնման աշխատանքներն իրականացնել ոչ թե Երևանում, այլ Գյումրիում՝ գյումրեցի ուսանողների մասնակցությամբ: Սակայն ինչպես նշվում է տեղեկատվության մեջ, պատասխան չի ստացել, ինչը բազմապատկել է տեղի բնակիչների վրդովմունքը:

Հայաստանի մշակութային մայրաքաղաք համարվող Գյումրու մի շարք գործարանների տարածքում Մինասի որմնանկարները հայտնվել են անցած դարի 70-ական թվականներին, որոնք տվյալ ձեռնարկությունների տնօրինություններ իրենց դրամական միջոցներով են պատվիրել։ 1988թ.-ի երկրաշարժից հետո դադարեցին գործել քաղաքի արտադրական ձեռնարկությունները, և շենքերի վթարայնության ու ջերմաստիճանային անբարենպաստ պայմանների հետևանքով խիստ վտանգվեց որմնանկարների հետագա գոյությունը և պահպանությունը։-0-