The king’s singers աշխարհահռչակ խումբն իր երգացանկում հայկական երաժշտություն կընդգրկի
The King’s singers բրիտանական աշխարհահռչակ խումբը մտադիր է հետագայում իր երկացանկում հայկական ժողովրդական և հոգևոր երաժշտություն ընդգրկել, ասաց խմբի անդամ Դևիդ Հարլին։
«Ինձ հատկապես հետաքրքրում է հայկական հոգևոր երաժշտությունը։ Կցանկանայի այն լսել և հետագայում օգտագործել»,- ուրբաթ մամուլի ասուլիսի ընթացքում ասաց Հարլին։
Երգիչը հույս հայտնեց, որ խմբի՝ Հայաստան կատարած առաջին այցը խթան կհանդիսանա հայկական երաժշտությունն իրենց երգացանկում ընդգրկելու համար։
Ըստ նրա, խմբի երգացանկն, ընդհանուր առմամբ, բավականին մեծ է՝ այն ընդգրկում է 2-ից-3 հազար երաժշտական կոմպոզիցիա՝ սկսած Վերածննդի դարաշրջանից մինչև ժամանակակից փոփ երաժշտություն։
Նշելով իր սեփական նախընտրությունները՝ Հարլին միաժամանակ ընդգծեց, որ անգլիական երաժշտության մեծ երկրպագու է։
The King’s singers խմբի համերգը կանցկացվի այսօր Երևանում և կնշանավորի «Երևանյան հեռանկարներ» միջազգային քսաներորդ երաժշտական փառատոնի բացումը։
Խմբի մասնակից Ջոնաթան Հովարդը հայտնեց, որ այսօր երեկոյան Երևանում կայանալիք համերգը բաղկացած կլինի երեք հիմնական մասից՝ առաջինում ընդգրկված կլինի Վերածննդի դարաշրջանի եվրոպական երաժշտություն, մասնավորապես, կոմպոզիտորներ Օրլանդո Լասո, Ժոսքեն Դեպրեի ստեղծագործությունները։
Երկրորդ մասում կհնչի Փոլ Բրայթոնի հայտնի «Գլուխգործոց» ստեղծագործությունը, իսկ երրորդ մասում ընդգրկված են ժամանակակից հայտնի փոփ երգեր։
The King’s singers բրիտանական հանրաճանաչ ակապելային սեքստետը Գրեմիի մրցանակակիր է, ստեղծվել է 1968 թվականին Քեմբրիջի համալսարանի The king’s college ուսանողների կողմից։ Խումբը հայտնի է ձայների լայն դիապազոնի և բազմաժանր երաժշտության բացառիկ մշակումների կատարումների շնորհիվ։ -0-
