Եվրատեսիլի հայ մասնակիցն ընդունում է իր հասցեին ուղղված առողջ քննադատությունը. թերթ

Դյուսելդորֆում կայացած «Եվրատեսիլ-2011» մրցույթի եզրափակիչ փուլ չհասած Էմմին հայտարարել է, որ ընդունում է իր հասցեին ուղղված առողջ քննադատությունը, հաղորդում է «Հրապարակ» օրաթերթը։

«Տեղյակ եմ սոցիալական կայքերի աժիոտաժներից և երկկողմանի համաձայնություն եմ տվել, այսինքն եղել եմ և լավ կարծիքներ արտահայտողների կողքին, և այն մարդկանց, ովքեր դժգոհություններ են արտահայտել։ Առողջ քննադատությունն ընդունում եմ այնպես, ինչպես որ կա»,- ասել է Էմմին՝ ավելացնելով, որ ավելի մանրամասն կարտահայտվի Եվրատեսիլի մասին առաջիկա մամուլի ասուլիսի ժամանակ։

Եվրատեսիլ երգի միջազգային մրցույթի մասնակցության վեց տարվա ընթացքում առաջին անգամ Հայաստանը չներկայացավ եզրափակիչ փուլում։

Այս տարվա մրցույթին Հայաստանի ներկայացուցիչը՝ էստրադային երգչուհի Էմմին, կիսաեզրափակիչ փուլում ելույթ ունեցավ չորրորդ համարի տակ՝ Boom-Boom երգով (երգի երաժշտության հեղինակն է Apricota խումբը, խոսքերինը՝ Սոսի Խանիկյանը, գործիքավորումն իրականացրել է Արա Թորոսյանը), բայց չանցավ մրցույթի եզրափակիչ փուլ։

Կիսաեզրափակիչ փուլից անմիջապես հետո սոցիալական ցանցերը, ֆորումները ու բլոգներն արձագանքեցին երգչուհու անհաջողությանը։

Հայաստանը մասնակցում է «Եվրատեսիլ» մրցույթին 2006թ.-ից։ 2008թ.-ին հայ կատարող Սիրուշոն Եվրատեսիլում չորրորդ տեղը զբաղեցրեց՝ գերազանցելով իր երկրի նախկին ներկայացուցիչների՝ Անդրեի (2006) և Հայկոյի (2007) արդյունքները, ովքեր ութերորդ տեղն էին զբաղեցրել նախկին մրցույթներում։ -0-