Շառլ Ազնավուրը կգլխավորի Հայաստանի եկեղեցիների վերանորոգման հիմնադրամը. թերթ

Ֆրանսահայ հայտնի շանսոնյե Շառլ Ազնավուրը կգլխավորի Հայաստանի եկեղեցիների վերանորոգման հիմնադրամը, ուրբաթ գրում է «Սոբեսեդնիկ Արմենիի» թերթը:

Թերթի տեղեկատվության համաձայն՝ նախագծի նախաձեռնողը ձեռներեց, մեկենաս Լևոն Հայրապետյանն է:

Ինչպես թերթին հայտնել է «Ծագումով հայեր» հաղորդաշարի հեղինակ Մանանա Հակոբյանը, Հայաստանում կա շուրջ 70 ավերված եկեղեցի, Լեռնային Ղարաբաղում գտնվող ևս մի քանի եկեղեցի վերանորոգման կարիք ունի: Նրա խոսքերով՝ հիմնադրամի նախագիծը ստացել է «Հայաստան. թանգարան բաց երկնքի տակ» պայմանական անվանումը:

Հակոբյանը պատմել է, որ ստանալով հիմնադրամը գլխավորելու առաջարկը՝ լեգենդար շանսոնյեն Շվեյցարիայից միանգամից գնացել է Փարիզ, ծանոթացել է նախագծի հետ և համաձայնել: Ենթադրվում է, որ Ազնավուրը կդառնա հիմնադրամի պատվավոր նախագահ:

Ինչպես գրում է թերթը, նախագծի ֆինանսական աջակցության մասին արդեն նախնական պայմանավորվածություններ կան մի քանի ձեռներեցների հետ, սակայն ծախսերի առյուծի բաժինը կվերցնի իր վրա բարերար Լևոն Հայրապետյանը:-0-