Թանգարանային գիշերն այս տարի Հայաստանում կանցկացվի «Գրավոր ժառանգություն» կարգախոսով, ասաց հանրապետության մշակույթի նախարար Հասմիկ Պողոսյանը:
««Թանգարանային գիշեր» ծրագիրը, որն այս տարի կանցկացվի մայիսի 18-ին, կիրականացվի «Գրավոր ժառանգություն» կարգախոսով, այսինքն մենք հնարավորություն կունենանք ցուցադրել թանգարաններում եղած ժառանգությունը և այն հասանելի դարձնել հասարակությանը»,- ուրբաթ մամուլի ասուլիսի ժամանակ ասաց Պողոսյանը:
Նա ցավով նշեց, որ այսօրվա դրությամբ հայկական գրավոր ժառանգության զգալի մասը պահպանվում է տարբեր թանգարանների արխիվներում: «Մեր պատկերացմամբ, այդ ողջ ժառանգությունը պետք է պահպանվի միայն Մատենադարանում կամ Գրականության և արվեստի թանգարանում»,- ընդգծեց նախարարը:
Ըստ նրա, այդ կարգախոսով «Թանգարանային գիշեր» ծրագրի անցկացման նպատակն է 2012թ.-ին հայկական գրական ժառանգությունը ներկայացնելու միջոց մշակել, երբ Երևանը կդառնա գրքի համաշխարհային մայրաքաղաքը:
Հայաստանը 2012թ.-ին կնշի առաջին տպագիր գրքի տպագրության 500-ամյակը: Հայկական գրատպության սկիզբը համարվում է 1512թ.-ը, երբ Վենետիկում Հակոբ Մեղապարտը հրատարակել է առաջին հայկական «Ուրբաթագիրք»: Մեղապարտի տպագրած գրքերի վերջում կա տպարանանիշ, որ խաչակիր շրջանակ է՝ երկգիծ քառակուսու մեջ: Հակոբ Մեղապարտը ջանացել է իր տպագրած գրքերը նմանեցնել ձեռագրերի, քանի որ այն ժամանակ տպագիր գրքերն անսովոր էին հայերի մեջ: Մեղապարտի գործունեության շնորհիվ հայոց լեզուն Ասիայի և ԱՊՀ ժողովուրդների մեջ գրատպության առաջին լեզուն դարձավ:
Հոբելյանի կապակցությամբ, ՅՈՒՆԵՍԿՕ-ն Երևանը որպես 2012թ.-ի գրքի համաշխարհային մայրաքաղաք է հռչակել:
Երևանը Գրքի համաշխարհային մայրաքաղաք հռչակված տասներկուերորդ քաղաքն է դարձել: Ավելի վաղ այդ տիտղոսին է արժանացել Մադրիդը (2001), Ալեքսանդրիան (2002), Նյու-Դելին (2003), Անտվերպենը (2004), Մոնրեալը (2005), Թուրինը (2006), Բոգոտան (2007), Ամստերդամը (2008), Բեյրութը (2009), Լյուբլյանան (2010) և Բուենոս-Այրեսը (2011): -0-
