Պետական Էրմիտաժի տնօրեն Միխայիլ Պիոտրովսկին առաջարկել է հայ գիտնականներին վերսկսել պեղումները «Կարմիր Բլուրում»։
«Մենք այդ նախագիծը քննարկել ենք Հայաստանի Գիտությունների ազգային ակադեմիայի նախագահության հետ, և վատ չի լինի, եթե նախագահությունն ընդունի այն։ Այնտեղ դեռևս շատ չպեղված հատվածներ կան։ Հիշեցնեմ, որ արխիվն առայսօր չի գտնվել»,- ասել է Էրմիտաժի տնօրեն, Ռուսաստանի գիտությունների ակադեմիայի թղթակից անդամ, Հայաստանի ԳԱԱ օտարերկրացի անդամ Միխայիլ Պիոտրովսկին ուրբաթ «Նովոստի-Արմենիա» գործակալությանը։
Էրմիտաժի տնօրենի կարծիքով, պեղումների վերսկսումը կօգնի նաև հուշարձանի վերածնմանը։ «Հուշարձանն այսօր այդքան էլ լավ վիճակում չէ, այն հողով է ծածկվել և մշակութային կենդանի ժառանգության մաս չէ, և վատ չէր լինի վերադարձնել դրան այդ կարգավիճակը»,- ասաց Պիոտրովսկին։
Էրմիտաժի տնօրենը կարծում է, որ «Կարմիր Բլուրը» կարող է գիտազբոսաշրջային խոշոր կենտրոն դառնալ։ «Որքան ես գիտեմ, այնտեղ պատրաստվում են ճանապարհ կառուցել, և լավ կլիներ օգտագործել այդ ճանապարհը նաև հենց «Կարմիր Բլուրը» կարգի բերելու համար, որը «Էրեբունու» հետ միասին կարող է գործել միաժամանակ և որպես զբոսաշրջային, և որպես գիտական օբյեկտ»,- ավելացրել է նա։
Կարմիր բլուրը գտնվում է Հրազդանի ձախ ափին, Երևան քաղաքի արևմտյան ծայրամասում։ 1936 թ.-ին Կարմիր բլուրում Արգիշտի Բ-ի որդու՝ Ռուսա թագավորի անունով ուրարտական սեպագիր արձանագրություն է գտնվել (մթա 7-րդ դար)։
«Կարմիր բլուր» պատմավայրը «Էրեբունի» թանգարանի մի մասն է։ 1930-ականների վերջից մինչև 1971 թվականը հայտնի հնագետ Բորիս Պիոտրովսկու անցկացրած պեղումների արդյունքում այստեղ մթա 7-րդ դարին, այսինքն՝ Վանի թագավորության երկրորդ ժամանակաշրջանին վերաբերող առարկաներ են հայտնաբերվել։ --0-
