Պլասիդո Դոմինգոն և Յուրի Բաշմետը ելույթ կունենան Հայաստանի անկախության 20-ամյակին նվիրված համերգի ընթացքում

Պլասիդո Դոմինգոն և Յուրի Բաշմետը ելույթ կունենան Հայաստանի անկախության հռչակման 20-ամյակին նվիրված համերգի ընթացքում, չորեքշաբթի լրագրողներին հայտնեց ՀՀ պետական ֆիլհարմոնիկ նվագախմբի գլխավոր դիրիժոր և ղեկավար Էդուարդ Թոփչյանը:

«2011թ.-ի սեպտեմբերի 21-ին Հանրապետության հրապարակում Հայաստանի անկախության 20-ամյակին նվիրված մեծ տոնական համերգ տեղի կունենա, որին կմասնակցի Հայաստանի Պետական ֆիլհարմոնիկ նվագախումբը, համաշխարհային մեծության աստղեր կհրավիրվեն»,- ասաց նա:

Ըստ դիրիժորի, վերջին շրջանում պետությունը հատուկ ուշադրություն է հատկացնում դասական երաժշտությանը:
«Ինչ-որ պահի ինձ մոտ այն տպավորությունն էր ստեղծվել, որ մեր երկրի բարձր արվեստի իրավիճակը վտանգի տակ է գտնվում: Սակայն այժմ տեսնելով, թե ինչ քայլեր են ձեռնարկվում, ես այլ եզրակացությունների եմ հանգում»,- նշեց Թոփչյանը:

Նա նաև տեղեկացրեց, որ սեպտեմբերին նախատեսված է Երևանի միջազգային երաժշտական 5-րդ փառատոնի անցկացման հետաքրքիր ծրագիր, որի շրջանակներում շուրջ 15 ականավոր երաժիշտներ ելույթ կունենան Երևանում:

2010թ.-ի դեկտեմբերին Պլասիդո Դոմինգոն առաջին անգամ համերգով  ելույթ ունեցավ Երևանում՝ «Երևանյան հեռանկարներ» միջազգային 11-րդ փառատոնի աշնանային սեզոնի շրջանակներում:
Ավելի վաղ Յուրի Բաշմետը բազմիցս ժամանել է Հայաստան, այդ թվում՝ «Երևանյան հեռանկարներ» փառատոնի շրջանակներում: 2010թ.-ի մարտին երաժիշտը մենահամերգ է ունեցել Երևանում: -0-