Հայտնի ջութակահար Վենգերովը հերքել է իր կարիերայի ավարտի վերաբերյալ լուրերը

Աշխարհահռչակ ջութակահար և դիրիժոր Մաքսիմ Վենգերովը հերքել է լուրերը ջութակահարի իր կարիերայի ավարտի մասին։

«Երեք տարի առաջ «Sunday Times»-ում նման հոդված է լույս տեսել։ Ցավոք, դա իմ հարցազրույցի սխալ մեկնաբանումն էր։ Ես չեմ կարող ասել, որ դադարեցնում եմ իմ երաժշտական գործունեությունը։ Դա նույնն է, ինչ ասել, թե ես հրաժարվում եմ խոսել իմ մայրենի լեզվով՝ ռուսերենով։ Դա իմ մայրիկի լեզուն է... Եվ ջութակն էլ միշտ ինձ հետ կլինի»,- ասաց Վենգերովը հայ լրագրողներին։

Երաժիշտն ավելացրեց նաև, որ ոչ միայն միշտ նվագել է և կնվագի ջութակ, այլ փորձեր է կատարել նաև ջութակի էլեկտրոնային տեսակի հետ։ Վենգերովը հայտնեց նաև, որ չորս տարի ջութակի դասընթացներ է տվել գերմանական համալսարաններից մեկում։

«Ես չէի ցանկանա ինքս ինձ որևէ սահմանների մեջ դնել, որովհետև ինձ համար դիրիժորությունը երաժիշտների հետ շփման միջոց է։ Ջութակահարի գործունեությունը հիանալի է, բայց բավականին միայնակ։ Բեմ ես դուրս գալիս և հեռանում ես, իսկ այդպես ես հնարավորություն ունեմ կիսելու ուրախությունս երաժիշտների հետ, կիսել իմացածս»,- ասաց երաժիշտը՝ մեկնաբանելով նաև դիրիժորի իր գործունեությունը։

Ականավոր ջութակահար և դիրիժոր Մաքսիմ Վենգերովն առաջին անգամ համերգով հանդես կգա Երևանում փետրվարի 22-ին։

Մաքսիմ Վենգերովը ժամանակակից առավել դինամիկ և բազմակողմանի երաժիշտներից է։ Աշխարհահռչակ ջութակահար լինելով՝ նա բազմիցս ելույթ է ունեցել համաշխարհային բեմերում հայտնի դիրիժորների ղեկավարությամբ և համագործակցել լավագույն երաժիշտների և նվագախմբերի հետ։

Վենգերովը միջազգային մի շարք երաժշտական մրցանակների դափնեկիր է, հեղինակավոր պարգևների մրցանակակիր, որոնց թվում են՝ երկու Grammy, չորս Gramophone Award UK, չորս Edison Award, երկու Echo Klassik Award, Amadeus Prize Best Recording, Brit Award, Prix de la Nouvelle,  Academie du Disque  Victoires de la Musique,  Siena Prize of the Accademia Musicale,  երկու Diapason d’Or,  RTL d’OR, Grand Prix Des Discophiles, Ritmo.
Նրա մասնակցությամբ նկարահանվել են բազմաթիվ երաժշտական ֆիլմեր։
1997 թվականից Վենգերովը ՅՈՒՆԻՍԵՖ-ի հանձնակատար է։ -0-