Բեռլինի միջազգային 61-րդ կինոփառատոնի շրջանակներում, երիտասարդ հայ կինոգործիչներն իրենց նախագծերն առաջին անգամ մի շարք գերմանական կինոընկերությունների ներկայացնելու հնարավորություն են ստացել, «Նովոստի-Արմենիա» գործակալությանը հայտնեցին ՀՀ մշակույթի նախարարության մամուլի ծառայությունից։
«Նախարարությունն օգնել է չորս երիտասարդ կինոգործչի մասնակցել փառատոնին»,- «Նովոստի-Արմենիա» գործակալության թղթակցին ասաց ՀՀ մշակույթի նախարարության մամուլի քարտուղար Գայանե Դուրգարյանը։
Բեռլին կմեկնեն Պարոնյանի անվան երաժշտական կոմեդիայի պետական թատրոնի երիտասարդ դերասան Նարեկ Ներսիսյանը, «Ժաննան և ձայները» ֆիլմի պրոդյուսեր Արմինե Աբրահամյանը, ռեժիսոր-սցենարիստ Արեգ Ազատյանը և Շողիկ Թադևոսյանը՝ «Ռոմանտիկները» սցենարով։
Դուրգարյանը նշեց, որ կինոփառատոնի շրջանակներում նախատեսված են երիտասարդ հայ կինոգործիչների և նրանց նախագծերով հետաքրքրված մի շարք գերմանական կինոընկերությունների հանդիպումները։
Բեռլինի միջազգային 61-րդ կինոփառատոնը մեկնարկել է փետրվարի 10-ին և կտևի մինչև փետրվարի 20-ը։
Ինչպես հաղորդում է ՌԻԱ Նովոստի գործակալությունը, Բեռլինի կինոփառատոնի մրցութային ծրագիրը բաղկացած կլինի 22 ֆիլմից, որոնցից 16-ը կարող են հավակնել «Ոսկե արջուկի», ինչպես նաև «Արծաթե արջուկների»՝ լավագույն ռեժիսուրայի, լավագույն տղամարդու և կանացի դերակատարման համար, Ալֆրեդ Բաուերի մրցանակի՝ կինոարվեստում նոր ճանապարհներ հարթելու համար, և մրցանակի՝ լավագույն դեբյուտի համար։ -0-
