ԵՐԵՎԱՆ, 7 փետրվարի. /Նովոստի-Արմենիա/. «Խաչքարեր. հայկական մշակույթի սրբազան հուշարձաններ» խորագրով լուսանկարչական ցուցահանդես է բացվել Օդեսայի պատմաերկրաբանական թանգարանի ցուցասրահում, հաղորդում է Ռուսաստանի հայերի «Երկրամաս» թերթի տեղեկատվական կենտրոնը:
Նախագծի համակարգող Արմեն Պետոյանը նշել է, որ ցուցահանդեսի գլխավոր նպատակն է հասարակության ուշադրությունը գրավել հայկական էթնոսի մշակութային ժառանգության պահպանման անհրաժեշտության վրա:
Ցուցահանդեսի բացմանը մասնակցել են Կիևի, Խարկովի, Օդեսայի, Ղրիմի հայկական համայնքների ղեկավարներն ու ներկայացուցիչները, թանգարանների ղեկավարներ, Հունաստանի գլխավոր հյուպատոսության ներկայացուցիչները, բուլղարական և հունական համայնքների ղեկավարները, շարքային քաղաքացիներ:
«98 դեպքերում խաչքարերը ծառայել են որպես տապանաքարեր: Սա Աստծո առջև ինքնատիպ ներկայացուցչություն է: Այսինքն, այստեղ հանգչում է ինչ-որ մեկի մարմինը, ով խաչքարերի, խաչի միջոցով Աստծուց խնդրում է արժանանալ նրա երկնային թագավորությանը, հավիտենական կյանքի», - պատմում է Ղրիմագիտության գիտահետազոտական կենտրոնի աշխատակից Տաթևիկ Սարգսյանը:
Ժամանակակից Ուկրաինայի տարածքում կան բազմաթիվ խաչքարեր: Ղրիմում դրանց թիվը հասնում է հարյուրի: Օդեսայի շրջանում ևս կան հնագույն հուշարձաններ: Այսպես, Օդեսայի մարզի Կիլիյսկի շրջանում գտնվող Սուրբ Նիկողայոս եկեղեցու տարածքում հայտնաբերվել են հայկական տապանաքարեր, որոնց վրա հաճախ օգտագործված են նույն մոտիվները, ինչ խաչքարերի վրա:
Ցուցահանդեսի կազմակերպիչները հույս ունեն, որ այս ցուցադրությունը կօգնի պահպանել ճարտարապետության այս հնագույն հուշարձանները, որոնք ոչ միայն հայերի, այլև Ուկրաինայում բնակվող այլ ժողովուրդների ժառանգությունն են:
2010 թ.-ի նոյեմբերի 17-ին ՅՈՒՆԵՍԿՕ-ն խաչքարերը ներառել է մարդկության ոչ նյութական ժառանգության ներկայացուցչական ցուցակի մեջ: -0-
