ՀՀ ոստիկանության ակադեմիայի կուրսանտները զբաղված են Վերդիի «Աիդա» օպերայի բեմադրության մեջ, որի պրեմիերան տեղի կունենա դեկտեմբերի 23-ին Ալեքսանդր Սպենդիարյանի անվան օպերայի և բալետի ազգային ակադեմիական թատրոնում, «Նովոստի-Արմենիա» գործակալությանը հայտնեցին նախագծի կազմակերպիչները։
ՀՀ մշակույթի նախարարությունն օպերայի բեմադրությունը տարվա վառ մշակութային իրադարձություններից մեկն է համարում։
«Ես ցանկանում եմ երախտագիտություն հայտնել բոլորին, ովքեր մասնակցություն են ցուցաբերել այդ նախագծի իրականացմանը»,- չորեքշաբթի լրագրողներին ասաց ՀՀ մշակույթի նախարար Հասմիկ Պողոսյանը։
Ըստ նրա, այդ մարդիկ աջակցել են ոչ միայն թատրոնին կամ ՀՀ մշակույթի նախարարությանը, այլ նաև ընդհանուր առմամբ հայկական մշակույթին։
«Ուզում եմ շնորհավորել մեզ բոլորիս և հուսով եմ, որ մեր բոլոր ակնկալիքները, որոնք կապված են բեմադրության հետ, կարդարացվեն և մենք ականատես կլինենենք իսկապես շատ կարևոր իրադարձության»,- նշեց Պողոսյանը։
Օպերայի բեմադրիչ, հայտնի իտալացի ռեժիսոր Մարիո Կորադին իր հերթին բարձր է գնահատել այդ նախագծի իրականացման գործում նախարարի անձնական ներդրումը։
Իտալական օպերային արվեստի գլուխգործոց «Աիդա» օպերան Հայաստանում առաջին անգամ բեմադրվել է 1941թ.-ին և մինչև 90-ական թվականների սկիզբը մնացել է Ալեքսանդր Սպենդիարյանի անվան օպերայի և բալետի ազգային ակադեմիական թատրոնի խաղացանկում։
Գրեթե քսան տարվա ընդմիջումից հետո, Հայաստանում Իտալիայի արտակարգ և լիազոր դեսպան Բրունո Սկապինի առաջարկությամբ հրավիրվել է հայտնի իտալացի ռեժիսոր Մարիո Կորադին, ով ստանձնել է օպերան բեմադրելու գործը։
Ըստ Կորադիի, հատուկ օպերայի համար 350 բեմական զգեստներ են կարվել։ Բեմադրությանը 300 մարդ է մասնակցելու։
Գլխավոր պարտիան կկատարի ՀՀ ժողովրդական արտիստ Հասմիկ Պապյանը։ Ռադամեսի դերը կկատարի Մյունխենի օպերային թատրոնի մեներգիչ, տենոր Գևորգի Օնիանին։
Եգիպտացի զորավարի և ստրկուհու սիրային պատմությունը կներկայացնեն օպերային թատրոնի մենակատարներ Մարինե Դեինյանը, Մագդա Մկրտչյանը, Աննա Մնացականյանը, Լիլիթ Սողոմոնյանը (Աիդայի դերակատարներ), ինչպես նաև Ռուբեն Նուրիջանյանը և Սարգիս Աղամալյանը (Ռադամեսի դերակատարներ)։ -0-
