Հայ ականավոր նկարիչ Երվանդ Քոչարի մի շարք աշխատանքների արտատպումը նոր տեխնոլոգիայով է կատարվել

ԵՐԵՎԱՆ, 15 դեկտեմբերի. /Նովոստի-Արմենիա/. Հայ ականավոր նկարիչ և քանդակագործ Երվանդ Քոչարի «Սասունցի Դավիթ» հայկական ազգային էպոսի արտատպումներն առաջին անգամ հրատարակվել են Fine Art Print նոր տեխնոլոգիայով։

«Նմանատիպ տեխնոլոգիան Հայաստանում կիրառվում է առաջին անգամ։ Սա շատ թանկ տեխնոլոգիա է՝ բավական է նշել, որ Քոչարի նկարների՝ մեր կողմից արված մեկ արտատպման ինքնարժեքը տատանվում է 200 դոլարի սահմաններում»,- լրագրողներին հայտնեց աշխատանքների արտատպումը նախաձեռնած MushArt ստուդիայի տնօրեն Մուշեղ Հովհաննիսյանը ցուցադրության բացմանը։

Ըստ նրա, տվյալ տեխնոլոգիան թույլ է տալիս ստեղծել բնօրինակներին առավելագույս մոտ արտանկարներ։

Հովհաննիսյանը նշեց, որ արտանկարների հրատարակումը սահմանափակ է, դրանք բոլորը համարակալված են և ունեն Երվանդ Քոչարի թանգարանի տարբերանշանը։

Ստուդիայի տնօրենը տեղեկացրեց նաև, որ Հայաստանում դեռևս մեծ աշխատանք կա անելու հայտնի ստեղծագործությունների կրկնօրինակների ստեղծման ուղղությամբ։

«Մասնավորապես, մենք բանակցություններ ենք վարում Մատենադարանի, ինչպես նաև Հայաստանի Ռուսական արվեստի թանգարանի հետ։ Վերջինի հետ մենք պայմանավորվածության ենք հասել հինգ ռուս նկարիչների ստեղծագործությունների կրկնօրինակների վերաբերյալ»,- հավելեց Հովհաննիսյանը։

Երվանդ Քոչարը (1899-1979) նկարիչ է, քանդակագործության, գեղանկարչության և գրաֆիկայի վարպետ, սիմվոլիզմի և ավանգարդի ներկայացուցիչ։ Նրա լավագույն ստեղծագործություններն այդ բնագավառում Երևանի Սասունցի Դավթի (1959, հայկական էպոսի հերոս) և Վարդան Մամիկոնյանի հուշարձաններն են (1964, հայերի առաջնորդն Ավարայրի դաշտում պարսիկների ճակատամարտում, 5 դար)։ -