Լեգենդար Տոնինո Գուերային նվիրված հայկական ֆիլմը երկու փառատոներում մրցանակների է արժանացել

Հայ ռեժիսորներ Ռուբեն և Վահե Գևորգյանցների «Հրաշագործի աշունը» փաստավավերագրական ֆիլմը, որը պատմում է իտալացի լեգենդար ռեժիսոր և սցենարիստ Տոնինո Գուերոյի մասին, արժանացել է «Նոր Կինո XXI Դար» միջազգային փառատոնի (Մոսկվա) և «Ոսկե դահիրա» հեռուստածրագրերի և ֆիլմերի միջազգային փառատոնի (Խանտի-Մանսիյսկ) մրցանակներին։

Ինչպես ուրբաթ «Նովոստի-Արմենիա» գործակալությանն են տեղեկացրել «Շարմ Հոլդինգ» հայկական պրոդյուսերական ընկերությունից, «Նոր Կինո XXI Դար» մոսկովյան փառատոնում լեգենդար Գուերոյի մասին հայկական ֆիլմը ստացել է գլխավոր մրցանակը։

Խանտի-Մանսիյսկում անցկացված փառատոնի արդյունքներով՝ «Հրաշագործի աշունը» ֆիլմի ռեժիսորներին հանձնվել է մրցանակ «Պատմություն և մշակույթ» անվանակարգում և փառատոնի խորհրդանիշ համարվող «Ոսկե Աստվածուհու» արձանիկը։

Բացի այդ, հայկական ֆիլմը ներկայացվել է մի շարք փառատոների, մասնավորապես Հռոմի Անկախ Կինոփառատոնի (Իտալիա), «Մոսկովյան պրեմիերա» կինոփառատոնի ՆԻԿԱ-ի (Ռուսաստան), «Ուղերձ Մարդուն» կինոփառատոնի (Ռուսաստան) մրցութային ծրագրերում։ Միևնույն ժամանակ ֆիլմը մասնակցել է ոչ մրցույթային ծրագրերում` 21-րդ դարի Իմիջներ (DocFest (Հունաստան), East Silver (Չեխիա), որտեղ ներկայացված են եղել եվրոպական լավագույն վավերագրական ֆիլմերը:

«Հրաշագործի աշունը» ֆիլմի երևանյան պրեմիերան տեղի է ունեցել 2007 թ.-ի հոկտեմբերին։ Գևորգյանցների ֆիլմը նկարահանվել է «Հայկ» վավերագրական ֆիլմերի պետական ստուդիայում՝ «Փայտ» և «Շարմ Հոլդինգ» մասնավոր ստուդիաների մասնակցությամբ։-0-