ԵՐԵՎԱՆ, 24 հունիսի./Նովոստի-Արմենիա/. Գերմանիայի Դաշնային հողի Շլեզվիգ-Հոլշտեյնի երաժշտական փառատոնի սիմֆոնիկ նվագախմբի համերգը տեղի կունենա հունիսի 25-ին՝ «21-ի հեռանկարները» իններորդ միջազգային երաժշտական փառատոնի շրջանակներում, երեքշաբթի «Նովոստի-Արմենիային» տեղեկացրեցին փառատոնի կազմկոմիտեից։
«Նման մասշտաբի կոլեկտիվի ժամանումը Երևանին դասում է միջազգային խոշոր երաժշտական կենտրոնների թվին»,- ասաց գործակալության զրուցակիցն, ավելացնելով, որ համերգը տեղի կունենա Հայաստանի պետական ֆիլհարմոնիայի Արամ Խաչատրյանի անվան համերգասրահում։
Նվագախմբի կազմում ընդգրկված են 100 հայտնի երիտասարդ երաժիշտներ՝ աշխարհի 24 երկրներից։ Համերգին մասնակցելու են նաև հայտնի դաշնակահար և դիրիժոր Քրիստոֆ Էշենբախը, թավջութակահար Դանիել Մյուլեր-Շոտը։ Համերգային ծրագրում ընդգրկված են Պրոկոֆևի, Դվորժակի և Չայկովսկու ստեղծագործությունները։
Նվագախումբը Երևան է ժամանելու Դրեզդենից, իսկ այստեղից մեկնելու է Վիլնյուս, այնուհետև Սանկտ-Պետերբուրգ, որտեղ մասնակցելու է ռուս դիրիժոր Վալերի Գյորգիևի փառատոնին։
«21-ի հեռանկարները» իններորդ երաժշտական փառատոնն անցկացվում է ՀՀ մշակույթի նախարարության աջակցությամբ՝ ՀՀ նախագահի բարձր հովանու ներքո։
Այս փառատոնի շրջանակներում Հայաստանում ելույթ են ունեցել համաշխարհային մեծության այնպիսի աստղեր, ինչպիսիք են Յուրի Բաշմետը, Վիկտոր Տրետյակովը, Ստիվեն Իսերլիսը, Քշիշտոֆոր Պենդերեցիկին, «Գիլիարդ» համույթը, «Քրոնոս» քառյակը, Տոկիո լարային քառյակը և այլ համաշրահային մեծություններ։--0—
