Երևանում՝ մայիսի 23-ին կկայանա «Jazz dance show» ներկայացումը

«Վահագն Հայրապետյան և կատուներ» հայտնի հայկական ջազ-բենդի համերգը և «Ամերիկյան սյուիտա» ջազային-պարային ներկայացումը տեղի կունենա մայիսի 23-ին Երևանում՝ Ալեքսանրդ Սպենդիարյանի անվան օպերային և բալետի ազգային ակադեմիական թատրոնի բեմում։

«Առաջին անգամ՝ պարային խմբի հետ միասին մենք ներկայացնում ենք օրիգինալ ծրագիր, որը բաղկացած է երկու մասից», - երեքշաբթի «Նովոստի-Արմենիա» գործակալությանը տեղեկացրեց սակսոֆոնիստ և «Կատուներ»-ի մենեջեր Դավիթ Նալչանջյանը։

Նրա խոսքերով, ջազի սիրահարների համար ծրագրի առաջին մասում «Կատուները» կկատարեն հինգ ստեղծագործություն՝ «Norevan» ալբոմից, որը դասական ջազառոքային և ավանգարդ-ազգայինի ինքնատիպ խառնուրդ է։

Երկրորդ մասում ելույթ կունենա պարային խմբակ՝ Արինա Արարատյանի ղեկավարությամբ, որը կներկայացնի «Ամերիկյան սյուիտա» ներկայացումը։

«Կազմակերպիչների նախաձեռնությամբ մեր ելույթը պետք է նախատրամադրի հանդիսատեսին՝ Արինայի համույթի ելույթի հանդեպ, որտեղ որպես երաժշտական ուղեկցում օգտագործվում են ջազային ստեղծագործություններ», - ասաց Նալչանջյանը։

Պարային խմբակի պարողներից մեկը՝ Վարդան Ղուկասյանն իր հերթին ավելացրեց, որ «Ամերիկյան սյուիտա» անվանումով ներկայացումը կցուցադրվի մայրաքաղաքում՝ արդեն իններորդ անգամ, սակայն նման մեկնաբանությունը կներկայացվի հանդիսատեսին առաջին անգամ։

«Այս հուզիչ ներկայացումը իրենից ներկայացնում է պարային բեմադրություն՝ Էլլա Ֆիցջերալդի, Լուի Ամստրոնգի երգերի հիման վրա», - ավելացրեց նա։

Ղուկասյանը կարծում է, որ «Կատուներ» խմբի հետ նման նախագիծը մեծ հետաքրքրություն  կառաջացնի ջազի հայ սիրահարների շրջանում։-0-