Երկուշաբթի Մեծ Բրիտանիայի մայրաքաղաքում բացվում է Լոնդոնի գրքի ամենամյա տոնավաճառը (London Book Fair 2008)։ Լոնդոնի «Ըրլս-քորթ» համալիրում անցկացվող եռօրյա ցուցահանդեսի կազմակերպիչներն առանձնահատուկ նշում են Լոնդոնի գրքի տոնավաճառի նկատմամբ օտարերկրյա մասնակիցների աճող հետաքրքրությունը։
Այս տարի տոնավաճառին մասնակցում են աշխարհի 62 երկրներից 1550 տարբեր ընկերություններ և հրատարակչություններ, ընդ որում բոլոր մասնակիցների 58 տոկոսը ժամանելու են Լոնդոն արտերկրից, հաղորդում է «ՌԻԱ Նովոստին»։
«Լոնդոնի 2008 թ.-ի գրքի տոնավաճառը իրականում կլինի համաշխարհային դասի իրադարձություն՝ օտարերկրյա մասնակիցների և տաղավարների մեծ քանակության առկայությամբ։ Նրանց ներկայությունը հաստատում է տոնավաճառի կարգավիճակը՝ որպես տարվա կարևորագույն իրադարձություններից մեկը համաշխարհային հրատարակչության արդյունաբերության մեջ»,- ասվում է միջոցառման մամուլի հաղորդագրության մեջ։
Առանձնահատուկ կերպով աճում է գրքի տոնավաճառի մասնակիցների թիվը Արևելյան Եվրոպայի երկրներից։ Այս տարի առաջին անգամ «Ըրլս-քորթում» առանձին տաղավարներում ներկայացված են Ռումինիան և Ռուսաստանը։
Այս տարի London Book Fair 2008-ի գլխավոր թեման է արաբական գրականությունը, որն ընտրված է որպես տովանաճառի «թիրախ շուկա»։ Կազմակերպիչների այս նախաձեռնությունը նպատակ ունի ընտրել առանձին տարածաշրջան կամ երկիր՝ որպես տոնավաճառի պատվավոր հյուր և օգնել հաստատել մշակութային և առևտրային կապերն այդ տարածաշրջանի կամ երկրի գրականագետների և միջազգային հրատարակչությունների միջև։
Լոնդոնի գրքի տոնավաճառին հանրահայտ գրողների թվում, որոնք արդեն հաստատել են իրենց մասնակցությունը, պորտուգալացի Պաոլո Կոելիոն է և բրիտանացի Ռեյնալֆ Ֆայնսը։ Բացի նրանցից, տարբեր միջոցառումներում կմասնակցեն երիտասարդ բրիտանացի և օտարերկրյա գրողներ, մանկական և մասնագիտացված գրականության հեղինակներ։-0-
