2009 թ.-ին ծրագրվում է կազմակերպել երգիծաբանների և երգիծանկարիչների համահայկական հավաք

Հայաստանի երգիծաբանների ասոցիացիան մտադիր է 2009 թ.-ին կազմակերպել երգիծաբանների և երգիծանկարիչների համահայկական հավաք, տեղեկացրեց ասոցիացիայի նախագահ Արամայիս Սահակյանը։

 «Այս ամենը հնարավորություն կտա հավաքել արտերկրում բնակվող բազմաթիվ հայ երգիծաբաններին, որպեսզի նրանք կարողանան ելույթ ունենալ հեռուստատեսային ծրագրերի շրջանակներում, հանդիպել հայրենակիցների հետ, ծանոթանալ Հայաստանի կյանքին, ինչը, հնարավոր է, նրանց նոր ոգևշնչում կհաղորդի՝ իրենց երգիծական ստեղծագործությունների կերտման համար», - երեքշաբթի Երևանում ասաց Սահակյանը լրագրողներին։

Երգիծանկարիչների միության նախագահ Սուքիաս Թորոսյանն իր հերթին ավելացրեց, որ երկրում ստեղծվել է երգիծանկարիչների թանգարանի ստեղծման անհրաժեշտություն։

«Այս դեպքում, երգիծանկարի վարպետների աշխատանքները կցուցադրվեն ոչ միայն ապրիլի 1-ին, այլ նաև գոնե ամիսը մեկ անգամ, և հնարավորություն կստեղծվի հետաքրքիր ցուցահանդեսներ և ցուցադրություններ կազմակերպելու համար», -  պարզաբանեց նա։-0-