Հայաստանի ազգային գրադարանը նշում է Վիլյամ Սարոյանի 100-ամյակը

Հայաստանի ազգային գրադարանը (ՀԱԳ) 2008 թվականին մի շարք միջոցառումներ կանցկացնի հայկական ծագումով ամերիկացի մեծանուն գրող Վիլյամ Սարոյանի 100-ամյակի կապակցությամբ, չորեքշաբթի լրագրողներին հայտնեց ՀԱԳ տնօրեն Դավիթ Սարգսյանը։

Նրա խոսքերով, մասնավորապես, կհրատարակվի «Վիլյամ Սարոյանը հայերեն լեզվով» մատենագրությունը։ «Մատենագրությունն արդեն կազմված է, և հիմա արվում են վերջին խմբագրական ուղղումները»,-ասաց նա։

Սարգսյանն ավելացրեց, որ երեկ Հայկական գրադարանային ասոցիացիայի նիստի ժամանակ որոշում է կայացվել Յոթերորդ ամենամյա գրադարանային շաբաթվա (2008թ. ապրիլի 14-21) մեկ օրը նվիրել Սարոյանին։

Հայտնի գրող Վիլյամ Սարոյանի 100-ամյակն ընդգրկվել է  ՅՈւՆԵՍԿՕ-ի 2008-2009թթ հոբելյանների պատվավոր ցուցակում։ «Սարոյանական տարին» արդեն մեկնարկել է ինչպես Հայաստանում, այնպես էլ գրողի ծննդավայր Ֆրեզնոյում։

Վիլյամ Սարոյանը (1908–1981) ամերիկացի արձակագիր է և թատերագիր, ծնվել է Ֆրեզնոյում հայ էմիգրանտի ընտանիքում։

Նրան ճանաչում է բերել Story ամսագրում տպագրված առաջին իսկ «Խիզախ մարդը թռչող ճոճաձողի վրա» պատմվածքների ժողովածուն։ Սարոյանի «Իմ սիրտը լեռներում է» առաջին պիեսը լույս տեսավ 1939 թվականին։ «Մարդկային ողբերգություն» վեպը գնել է MGM կինոստուդիան։-0-