«Հայաստանի փոքրիկ երգիչներ» երգչախումբը երաժշտական նոր կադրերի կարիք ունի. երգչախմբի ղեկավար
«Հայաստանի փոքրիկ երգիչներ» երգչախմբի կենսական խնդիրներից մեկը երաժշտական կրթություն ունեցող երեխաների պակասն է։ Այս մասին հինգշաբթի տեղի ունեցած մամուլի ասուլիսի ժամանակ հայտարարեց երգչախմբի հիմնադիր, գեղարվեստական ղեկավար և գլխավոր դիրիժոր Տիգրան Հեքեքյանը։
«Այսօր մեզ համար շատ բարդ է գտնել երաժշտական կրթություն ունեցող երեխաներ մեր երգչախմբի համար, և սա մեր գլխավոր խնդիրներից մեկն է», - նշեց նա։ Հայտնի դիրիժորի խոսքերով, դա կախված է երաժշտական կրթության որակի հետ, որը զգալիորեն վատացել է վերջին տարիների ընթացքում։
Հեքեքյանը ընդգծեց, որ «Հայաստանի փոքրիկ երգիչներ» երգչախմբի ցանկում են երաժշտական տարբեր ուղղություների երգեր՝ ռենեսանսի կլասիկա, ժամանակակից, հոգևոր, ժողովրդական երաժշտություն, ինչպես նաև պոպ, ռեպ և ջազ։
«Աշխարհում այդքան էլ շատ չեն մանկական խմբերը, որոնք կատարում են բոլոր այս ուղղությունները, և հենց սա է պատճառը, որ մեզ համար դժվար է ընտրել կադրեր մեր երգչախմբի համար», - նշեց նա։
«Հայաստանի փոքրիկ երգիչներ» երգչախումբը ստեղծվել է 1992 թ.-ին՝ Երևանի քաղաքապետարանի մշակույթի վարչության և «Հայաստանի փոքրիկ երգիչներ» միջազգային ասոցիացիայի մասնակցությամբ։
Երգչախմբում երգում են 14-18 տարեկան տաղանդավոր երեխաներ Հայաստանի բոլոր մարզերից, նրանք ակտիվորեն մասնակցում են հանրապետության մշակութային կյանքին և ելույթ են ունենում բարեգործական համերգներով ինչպես Հայաստանում, այնպես էլ նրա սահմաններից դուրս։ Երգչախումբը հյուրախաղերով հանդես է եկել Ռուսաստանում, Հունաստանում, Կիպրոսում, Գերմանիայում, Ֆրանսիայում, Շվեյցարիայում, Մեծ Բրիտանիայում, Եգիպտոսում, Հարավային Աֆրկայում, Չինաստանում, Լեհաստանում, Բելգիայում, ինչպես նաև Կանադայում և ԱՄՆ-ում։-0-
