Հայաստանի «Արևիկ» համույթը զբաղեցրել է երկրորդ տեղը Eurovision Junior – 2007 մանկապատանեկան մրցույթում

Հայաստանի «Արևիկ» համույթը, կատարելով «Երազանք» երգը, զբաղեցրել է երկրորդ տեղը Նիդեռլանդներում անցկացվող Eurovision Junior – 2007 մանկապատանեկան մրցույթում։

Եվրոպայի մասնակից-երկրների հեռուստադիտողների քվեարկության ամենասկզբից «Արևիկը» գրեթե անընդհատ առաջատար դիրքում էր, սակայն քվեարկության արդյունքում հավաքելով 136 միավոր՝ «Արևիկցիները» ընդամենը մեկ միավորով զիջեցին հաղթողին՝ Բելոռուսի ներկայացուցիչ 12-ամյա Ալեքսեյ Ժիգալկովիչին։

Հայկական համույթի վառ ելույթն ըստ արժանվույն գնահատեցին մասանվորապես Վրաստանի, Բելգիայի, Կիպրոսի, Ռուսաստանի, Ռումինիայի, Նիդեռլանդների բնակիչները՝ «Արևիկին» տալով առավելագույն 12 բալ։ 10-ական միավոր Հայաստանը ստացավ Շվեդիայից և Հունաստանից։

Eurovision Junior – 2007  մրցույթը տեղի է ունեցել դեկտեմբերի 8-ին՝ Ռոտերդամում (Նիդեռլանդներ)։ Մրցույթին մասնակցում էին 8-15 տարեկան  երգիչներ և խմբեր։

Մրցույթի կանոններով՝ երգը պետք է գրվի երեխայի կողմից և կատարվի մայրենի լեզվով, երգի տևողությունը չպետք է գերազանցի 2 րոպե 45 վայրկյանը։

Մրցույթում հաղթելու նպատակով մրցում էին 17 երկիր՝ Հայաստանը, Բելառուսը, Սերբիան, Վրաստանը, Մակեդոնիան, Ռուսաստանը, Բուլղարիան, Շվեդիան, Ուկրաինան, Ռումինիան, Հոլանդիան, Մալթան, Լիտվան, Կիպրոսը, Բելգիան, Պորտուգալիան և Հունաստանը։-0-