«Ճակատագիր» հայկական ֆիլմն արժանացել է «Հանդիսատեսի համակրանք» մրցանակին՝ Լոս-Անջելեսում կայացած փառատոնի ժամանակ

ԵՐԵՎԱՆ, 26 նոյեմբերի. /Նովոստի-Արմենիա/. «Ճակատագիր» հայ-ամերիկյան ֆիլմն արժանացել է  «Հանդիսատեսի համակրանք» մրցանակին՝ Լոս-Անջելեսում կայացած ամենամյա The Method fest փառատոնի ժամանակ։

Այս մասին երկուշաբթի տեղի ունեցած մամուլի ասուլիսի ժամանակ տեղեկացրեց «Ֆուլ Կոնտակտ Կարատե»-ի (IFCKF) միջազգային ֆեդերացիայի նախագահ Գոռ Վարդանյանը, որը ֆիլմում խաղացել է գլխավոր հերոսի կերպարը։

«Փառատոնի մրցութային ծրագրին ներկայացված 25 ֆիլմերի թվում մեր ֆիլմը արժանացել է հանդիսատեսի կողմից յուրահատուկ ուշադրության», - ասաց նա։

Վարդանյանի խոսքերով, Ղարաբաղյան շարժման իրադարձությունների մասին պատմող «Ճակատագիր» ֆիլմն իր մեջ կրում է քաղաքական իմաստ։

«Մեր հիմնական նպատակն է ներկայացնել այս ֆիլմը միջազգային հանրությանը, ինչպես նաև տարբեր կինոփառատոններին», - ավելացրեց նա։

«Ճակատագիր» ֆիլմի հիմքում ընկած են 1989-1991 թթ.-ին Լեռնային Ղարաբաղի տարածքում տեղի ունեցած իրական դեպքերը։

Ֆիլմը պատմում է Ղարաբաղյան շարժման սկզբի մասին։ Այն նկարահանվել է 2006 թ.-ին։

Ֆիլմի ռեժիսորներն են Արմեն Մազմանյանը և Վահե Խաչատրյանը, սցենարի հեղինակներն են Մարինա Սարգսյանը և Գոռ Վարդանյանը, գլխավոր դերերում են Գոռ Վարդանյանը, Եվգենի Կարնաշը, Անրի Վարդանյանը, Նարինե Սուլթանյանը և Սվետլանա Զուևան։-0-