ԵՐԵՎԱՆ, 23 հոկտեմբերի./Նովոստի-Արմենիա/.Երևանում երեքշաբթի բացվեց «Առօրյա հրաշքներ կամ սովորականը երեխաների աչքերով» երկրորդ մանկական լուսանկարչական ցուցահանդեսը, որը կազմակերպվել է «Քաղաքացիական հասարակության ցանց» ծրագրով։
Ինչպես «Նովոստի-Արմենիա» գործակալությանը հայտնեց «Քաղաքացիական հասարակության ցանց» ծարգրի հասարակական միջոցառումների կազմակերպիչ Գայանե Մարկոսյանը, ցուցահանդեսում ներկայացված են Դիլիջանի, Մարտունու, Վարդենիսի, Արծվանիստի, Ակունքի և Աղարդինի 6-10-րդ դասարանների աշակերտների շուրջ 70 լուսանկարներ։
«Մենք ընդհանրացնում ենք այդ համայնքներում իրականացված երկամյա աշխատանքների արդյունքները։ Մենք փորձել ենք ապացուցել, որ մշակույթի և քաղաքացիական դիրքորոշման մեջ շփման եզրեր կան, և հիմա շատերն արդեն համոզվել են դրանում»,-ասաց Մարկոսյանը։
Նա նշեց, որ «Քաղաքացիական հասարակության ցանց» ծրագիրը պարունակում է մշակութային և քաղաքացիական տարրեր, որոնցով իրականացվում են ոչ միայն մշակութային միջոցառումներ, այլ նաև տարբեր քննարկումներ, բանավեճեր, դասախոսություններ։
Մարկոսյանի կարծիքով, երիտասարդների շրջանում արվեստում ինքնարտահայտման միջոցով քաղաքացիական գիտակցության կրթությունը նպաստում է նրանց քաղաքական դիրքորոշման կայացմանը։
«Լուսանկարն այս իմաստով հատուկ տեղ է գրավում, քանի որ այն, թե ինչպես ենք նայում աշխարհին, կախված է իրականությանը գիտակցված մոտեցման աստիճանից։ Այս իամստով մենք լիովին բավարարված ենք ցուցահանդեսի արդյունքներով»,-ասաց նա։
Ցուցահանդեսի կազմակերպիչը նշեց, որ լավագույն երկու լուսանկարների հեղինակները որպես պարգև կստանան մեկական թվային լուսանկարչական ապարատներ, իսկ մյուս մասնակիցներին կշնորհվեն խրախուսական պարգևներ։
«Առօրյա հրաշքներ կամ սովորականը երեխաների աչքերով» ցուցահանդեսը «Քաղաքացիական հասարակության ցանց» ծրագրի բաղկացուցիչ մասերից է, որը երեք տարի է ինչ իրականացվում է Տավուշի և Գեղարքունիքի մարզերում։ Առաջին ցուցահանդեսը տեղի ունեցավ 2005-ի դեկտեմբերին։
«Քաղաքացիական հասարակության ցանց» ծրագիրն իրականացնում է չորս հասարակական կազմակերպությունների՝ Քաղաքացիական հասարակության ինստիտուտի, Քաղաքացիական նախաձեռնությունների ազատ հարթակի, Հելսինկյան քաղաքացիական համաժողովի և Հանուն ժողովրդավարության համագործակցության կենտրոնի կողմից՝ ԱՄՆ-ի միջազգային զարգացման գործակալության (USAID) աջակցությամբ։--0—
