ԵՐԵՎԱՆ, 23 հոկտեմբերի./Նովոստի-Արմենիա/. Երեքշաբթի Երևանում բացվեց «Ավանդական բանավոր ժառանգություն, ոչ նյութական մշակույթ. գիտելիք և խորհրդանիշ, հավատալիք և սովորույթ» խորագրով գիտա-գործնական համաժողովը։
«Մշակութային գլոբալիզացիան հանգեցրեց ազգային անհատականության, ազգային մշակույթի հարցերի լուծման նոր ուղիներ փնտրելու և գտնելու անհրաժեշտությանը, այդ թվում՝ ոչ նյութական մշակութային ժառանգության պահպանման հիմնախնդիրների առնչությամբ»,- համաժողովի ժամանակ հայտարարեց ՀՀ մշակույթի փոխնախարար, դրամատուրգ Կարինե Խոդիկյանը։
Նրա խոսքով, ՀՀ մշակույթի նախարարությունը մեծ աշխատանք է կատարել ՅՈՒՆԵՍԿՕ-ի «Ոչ նյութական մշակութային ժառանգության պահպանման մասին» միջազգային կոնվենցիայի վավերացման ուղղությամբ»։ Փոխնախարարն ավելացրեց, որ հիմա հանրապետությունում մշակվում է ոչ նյութական մշակութային ժառանգության պահպանման մասին օրինագիծը։
«Ծանոթանալով հայկական մշակույթի հետ, ամեն անգամ համոզվում եմ, որ մշակութային ժառանգությունը մեր երկրներին միավորող ուժն է», - նշեց Հայաստանում Ռուսաստանի դեսպանության խորհրդական, Ռուսաստանի ԱԳՆ կից Միջազգային գիտական և մշակութային համագործակցության ռուսական կենտրոնի հայկական ներկայացուցչության տնօրեն (Ռոսզառուբեժցենտր) Անատոլի Նիկոլաևը։
Համաժողովը տեղի կունենա հոկտեմբերի 23-24 ՀՀ մշակույթի նախարարության նախաձեռնությամբ՝ ՅՈՒՆԵՍԿՕ-ի «Ոչ նյութական մշակութային ժառանգության պահպանման մասին» միջազգային կոնվենցիայի շրջանակներում։
Միջոցառման օրակարգում մշակույթի, մշակութային գլոբալիզացիայի առավելությունների և վնասների ոլորտներում իրավական դաշտի կարգավորման հարցերն են, ինչպես նաև ոչ նյութական մշակութային ժառանգության միջազգային փորձը։
Համաժողովին մասնակցում են ՀՀ ԱԺ, ՀՀ արդարադատության նախարարության, Սահմանադրական դատարանի ներկայացուցիչները, սոցիալ-մշակութային ոլորտի մասնագետները, ՀՀ ԳԱԱ աշխատակիցները, ինչպես նաև փորձագետներ Ռուսաստանից, Ուկրաինայից, Բելառուսից և Վրաստանից։
«Ոչ նյութական մշակութային ժառանգության պահպանման մասին» միջազգային կոնվենցիան ընդունվել է ՅՈՒՆԵՍԿՕ-ի 2003թ. հոկտեմբերի վեհաժողովում և ուժի մեջ մտել 2006թ. ապրիլի 20-ից։ ՀՀ կառավարությունը միացել է «Ոչ նյութական մշակութային ժառանգության պահպանման մասին» միջազգային կոնվենցիային 2004թ. մարտին։ --0—
